niuerneq
Avammut tunisat siuariarujussuartut
Aalisakkanut akit qaffakkiartorneri isaatitsissutaalluarput
Avammut tunisassiorneq 2016-mi qaammatit arfinillit siulliit malunnaateqarluartumik qaffariaateqarpoq. Kalaallit Nunaanni Naatsorsueqqissaartarfiup kisitsisaataanni tamanna takuneqarsinnaavoq.
Ukiup siulianut sanilliullugu 32,8%-nik tunisassiornerusoqarsimasoq paasinarsivoq. Ukioq mannalu qaammatini arfinilinni siullerni 1.527 mio. koruunit avammut tunisanit isertitsissutaapput, tassa ukiup siulianut sanilliullugu 377 mio. koruuninit amerlanerullutik.
Tunisat pisiallu oqimaaqatigiilluarnerulertut
Kinguppaat qaleraliillu akiisa qaffanneri siuariaateqarluarnermut pissutaapput. Taakku 138 mio. koruuninik 135 mio. koruuninillu qaffariaateqarsimammata.
Nioqqutissanik eqqussuineq aamma annertuseriarpoq avammulli tunisassiornertut qaffariartiginani. Tamannalu tunisat pisiallu oqimaaqatigiinnerannik 35 mio. koruuninik pitsanngoriarfiulluni.
Taamaakkaluartoq tunisat pisiallu oqimaaqatigiinneri suli amigartoorutaaffiupput. Tassa avataanit pisiagut tunisatsinnit amerlanerupput.