Avammut tuniniaanissamut akuersissut utaqqineqartoq
Greenland Spring Waterip Qeqertarsuarmi Uunartuarsuup Puilasuani akuersissutaa imermik avammut tuniniaanissamik suliniutinik allanik akornusiivoq
Namminersorlutik inuussutissarsiortut Svend Hardenbergip Jørgen Wæver Johansenillu tupigusuutigaat Greenland Spring Waterip Qeqertarsuarmi akuersissutaanik Namminersorlutik Oqartussat taama kigaatsigisumik suliarinninnerat, tassuunakkut ingerlatsiviit allat avammut tuniniaanissamut periarfissaat akornuserneqarmat.
Aviisi Sermitsiaq allappoq.
Svend Hardenbergip Jørgen Wæver Johansenillu ingerlatseqatigiiffiutertik Greenland Water Bank aqqutigalugu Qeqertarsuarmi Uunartuarsuup Puilasuanit imermik avammut tuniniaanissamik 2016-imiilli aallartitsiniarsimapput. Puilasumilli tassannga Greenland Spring Waterip imermik tunisassiornissamut akuersissutaa pissutigalugu imeq nunap killeqarfiisa avataanut anninneqarsinnaanngilaq.
Svend Hardenberg naapertorlugu Greenland Spring Water imermik maqiterivittut atukkaminnit annertunerujussuarmit imermik avammut tuniniaanissaminnut kisermaassisuuvoq. Ingerlatseqatigiiffillu 2018-imi apriilip aallaqqaataata tungaanut piffissalerneqarsimavoq imermik avammut tuniniaanissamissut annertutigisumik tunisassiorluni. Atuinissamut akuersissummi allassimasutut tunisassiornerup minnerpaaffissaa qaangersimanngippassuk, Qeqertarsuarmit puilasumit imermik avammut tuniniaanissaminnut akuersissutaat Inuussutissarsiornermut, Sulisartoqarnermut, Niuernermut Nukissiuuteqarnermullu Naalakkersuisoqarfiup utertissinnaavaa.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: