avaleraasartuut
Avaleraasartuunut politikkimi sangujoraarneq
– Naalakkersuisut avaleraasartoortassanik agguaassinerat paasiuminaappoq, Inuit Ataqatigiinneersoq Debora Kleist oqarpoq
Ukioq manna Tunumi avaleraasartoorniarneq aallartippoq, piffissamili kingullermmi pisassat agguaanneqarnerannik apeqqutit ima amerlatigaat, Naalakkersuisut avaleraasartuunut politikkiat pitsaanerpaaguni paasiuminaappoq, ajornersaagunilu kinaassusersiunngitsumik ingerlatsinerunngilluinnarluni.
Sermitsiaq taama allappoq.
Inuit Ataqatigiinneersup Debora Kleistip Siumumeersullu Nikolaj Jeremiassenip pisassanik agguaassineq apeqquteqarfigisimavaat, aalisarnermulli piniarnermullu Naalakkersuisup Kral-Kristian Krusep akissutigdigallagaatigut avaleraasartuunut politikki qanoq ittuunersoq qujaalarneqanngilaq.
Debora Kleistip tikkuarpaa kujataani aalisarnermik selskabi Arctic Prime Fisheries, marlunnik angallataatilik, »Ilivileq« aamma »Qavak«, ukioq manna pisassinneqarsimanngitsoq, selskabi Iluliaq Seafood, ikerinnarmiunik aalisarnissamut nammineq angallataateqanngitsoq, 4.000 tonsinik avaleraasartoortassinneqarsimasoq.
Debora Kleistip Iluliaq Seafood toqqarlugu tikkuarmagu, tamtumunnga pissutaavoq selskabi siorna landskarsip »tunisassiorfimmik ingerlatsinissamut isumaqatigiissutinut aningaasaataanit« 500.000 koruuninik tunineqarsimammat. Aningaasat taakkua Qassimiuni suliffissuup ammaqqinneqarnissaanut atorneqartussaasimapput, selskabilli suliassaq kivissinnaasimanngilaa.
– Paasiuminaappoq Naalakkersuisut selskabi ingerlalluartoq nammineq angallataatilik itigartimmassuk, selskabilu ilumut ingerlalersinnaaneranik qularnaatilik pisassillugu, Debora Kleist oqarpoq, taannalu isumaqarpoq pissusissamisuussasoq Naalakkersuisut pisassanik agguaassinerisa nalilersoqqinnissaa.
Nikolaj Jeremiassenip isornartoqartittorujussuuvaa tunumi inuussutissarsiornermik suliniutit tassani aalisartunik peqataaffiginartut maangaannartinneqarmata pisassiissuteqannginneq pissutigalugu.
– Tunumiut ineriartornermut isiginnaartuinnanngortinneqarput, Nikolaj Jeremiassen oqarpoq.
Sermitsiami paasisaqarnerugit: