Avaleraasartorniarnermi qinnuteqarfissap kinguartinneqarnera IA-mit isornartorsiorneqarpoq

Avaleraasartoorniarnissamut qinnuteqaat maajip arfineq aappaanut Aalisarnermut, Piniarnermut Nunalerinermullu Naalakkersuisoqarfimmit kinguartinneqarsimanera pillugu Sermitsiaq.AG sapaatip akunnerata siuliani allaaserisaqarpoq.

Sooq qinnuteqarfissap kinguartinneqarsimanera pillugu Naalakkersuisoqarfimmit nassuiaassutigineqanngilaq.

IA: Aningaasat isertinneqarsimasinnaasut annaaneqartut
Qinnuteqarfissap kinguartinneqarsimanera Inuit Ataqatigiinnit isornartorsiorneqarpoq.

- Aningaasarliornitta nalaani aningaasarsiutigilluarsinnaasagut tamaasa atorfissaqarteqaagut, ukioq manna avaleraasartorniarnissamut qinnuteqarfissap kinguarteqqinneqarnera naggataatigut suliffinnik akileraarutissanillu isertitassaagaluarnik annaasaqarnermik kinguneqarsinnaavoq, Inuit Ataqatigiit tunuliaqutaralugit Inatsisartuni ilaasortaq Ane Hansen tusagassiutinut nalunaarummi allappoq.

Suliffeqarfinnik piorsaaneq
Aalisartut piutit akisoqisut pissarsiarinissaannut piarersarnissaannullu piffissamik atuisarput kingusippallaamillu qinnuteqaatip akuerineqarnera itigartinneqarneraluunnit aalisartumut annertuumik annaasaqataasartoq Ane Hansen oqarpoq.

- Taamammat Inuit Ataqatigiit Aalisarnermut Naalakkersuisoq kaammattorpaat piartumik ukioq manna avaleraasartorniarnissamik qinnuteqarsimasut akissuteqarfigeqqullugit suliffissanik akileraarutinillu isertussanik annaasaqarsinnaaneq pinaversaqqullugu. Avalerarsatorniarneq suli nunatsinni nutaraaqaq taammmallu aalisariutit avaleraasartorniarnermut naleqqussarneqarnissaat aamma pisariaqartinneqarpoq tamannalu aamma nalikitsuungilaq.

- Ilangullugu kaammattuutigarput avaleraasartuut nunami suliffissaqartitsilersinnaanerat pillugu suliffissuatillit akornanni oqaloqatigiinneq aallarteqqullugu, suliffissanik amigaateqarpugut suliffiusinnaasullu tamaasa inerisarneqarnissaat ilangullugu pisariaqartipparput, Ane Hansen oqarpoq.