avaleraasartoortassat
Avaleraasartoorniarnissamut akuersissummut itigartitsineq nassuiaatitaqanngitsoq
Kalaallit ingerlatseqatigiiffiini Arctic Prime Fisheries kisiartaalluni avaleraasartoorniarnissamut akuersissummut naalakkersuinikkut itigartinneqarpoq. Naalakkersuinikkut tamanna aalajangiineruvoq, Karl-Kristian Krusep tamanna nassuiarusunngilaa.
Kujataani aalisariutaatilik Arctic Prime Fisheries sooq ukioq manna avaleraasartoorniarnermut peqataasinnaannginnersoq, aalisarnermut piniarnermut naalakkersuisoq, Karl-Kristian Kruse nassuiaateqanngilaq.
Paragraf 37 naapertorlugu Debora Kleistip (IA) apeqqutaanut isumaqanngitsumik akissuteqaannarpoq.
Arctic Prime Fisheries Nunatsinni avaleraasartoorniarnermut tunngatillugu ingerlatseqatigiiffiit misilittagaqqortunerpaat ilagigaat, Sermitsiami saqqummertumi kingullermi oqaluttuarineqarpoq.
2015-imi aalisariutaatillit 8.000 tonsinik avaleraasartoortassinneqarput; 2016-imi »Ilivileq« »Qavallu« nunatsinni aalisariutaatillit allat peqatigalugit avaleraasartoorniarnissami paggatassiinermi peqataapput katillugit 35.000-it pisarineqartussaallutik saniatigullu 2.222 tonsinik pisaassaqarlutik.
Naalakkersuisoqarfimmi pisortaq Jørgen Isak Olsen Sermitsiamut oqarpoq Arctic Prime Fisheries ukioq manna kalaallit aalisariutaatillit avaleraasartoorniarnermi peqataasussat allattorsimaffianniissimasoq aalisarnermut piniarnermullu Nalaakkersuisoqarfiup Naalakkersuisunut innersuussaani.
Kisianni kalaallit ingerlatseqatigiiffiini kisiartaalluni allattorsimaffimmit peerneqarpoq.
- Naalakkersuinikkut aalajangiineruvoq, Naalakkersuisullu aperisariaqarpatit, Jørgen Isak Olsen oqarpoq.
Sermitsiamit aalisarnermut piniarnermullu Naalakkersuisoq Karl-Kristian Kruse aperiniarsimagaluarparput sooq Arctic Prime Fisheries allattorsimaffimmit peerneqarsimanersoq iluatsinngitsumilli.
Debora Kleist (IA) paragraf 37 naapertorlugu apeqquteqaammini tunngaviliisoqarnissaanik piumasaqaraluarpoq. Kisianni akissummi Karl-Kristian Kruse (S) avaqqullugu akissuteqarpoq.
- Avaleraasartoortassanik qinnuteqarsimasunit kikkut akuerineqassaneri Naalakkersuisunit aalajangiiffigivinneqartarpoq. Avaleraasartoorniarnermi piumasaqaatit Naalakkersuisunit aalajangersarneqarsimasut naapertorlugit qinnuteqaatit aalajangiiffigineqartarput Aalisarnermullu inatsimmi § 24 imm. 1-imi piumasaqaataasut naapertorlugit Naalakkersuisut nalilersimavaat Arctic Prime Fisheries qinnuteqarsimasut akornanni akuersissummik tunineqartariaqanngitsut ilagigaat, akissuteqaammini taanna allappoq.
Tamanna pillugu Sermitsiaq annerusumik paasissutissaateqarpoq: