avaleraasartuut
Avaleraasartoorniarneq unippoq – Nunatta Karsia artornartorsiorpoq
Akiitsuutinik appaaneq 60.000 tonsinik avaleraasartoorniarnermik kinguneqassasoq Naalakkersuisut siunniukkaluarpaat. 37.227 tonsit pisariaqarput
Aningaasaqarnermut akileraartarnermullu Naalakkersuisup Aqqaluaq B. Egedep upernaaq Inatsisartut aalisarnermut akitsuutit apparmatigit ukioq´manna avaleraasartoorniarnissaq neriuuteqarfigisimasorujussuuaa.
Taassuma akitsuutit apparujussuarnerat 60.000 tonsinik aalisartoqarneranik kinguneqassasoq naatsorsuutigisimavaa.
Kisianni augustip ulluisa 23-anni Tasiilap Islandillu akornanni imartami avaleraasartoorniarfigineqartoq kilisaatit kingulliit qimappaat, aamma katillugit 37.227 tonsinik avaleraasartoortoqarnera naatsorsuutigisanik naammassinninnerunngilaq.
Kalaallit kilisaataataasa 19.439 tonsit aalisarpaat. Kilisaatit nunanit allaneersut 17.788 tonsit (Rusland 11.322 tonsit, Savalimmiut 4.002 tonsit aamma Island 2.464 tonsit).
Pisat taama annertutigisut Nunatta Karsianut 25.563.000 koruuninik akiliissutaapput, taamaattorli tassani akitsuutit 40 million koruuniunissaat naatsorsuutigineqarsimagaluarput.
Avaleraasartoorniarneq pillugu Sermitsiami paasisaqarnerusinnaavutit. Aviisi digitaliusoq uani ataani linki atorlugu atuarneqarsinnavoq: