pisassiissutit

Avaleraasartoorniarneq ajornartorsiorfioqqippoq

Aalisartut arlallit naliliipput avaleraasartoortassat kingusippallaamik agguarneqaqqinnerat ajorluinnartoq

Siorna arlalippassuarnit oqaatigineqarsi­magaluartoq avaleraasartoortassat siu­sinnerusukkut agguaanneqarnissaat pisari­aqartoq, aalisartut pisassiissutit nungullugit aalisarsinnaassappatigit aammalu nutaanik aalisartoqalissappat, ukioq manna pisassat agguarneqarnerat kinguartoorfioqqippoq.

Sermitsiaq taama allaaserisaqarpoq.

Tamatumunnga tunngavilersuutit ilagaat avaleraasartuunut akitsuut nutaaq aatsaat maajip 18­ianni akuersissutigineqarsimam­mat juunillu aallaqqaataani atuutilerluni.

Tunngavilersuutilli suugaluarpataluunniit tamanna inuiaqatigiit aningaasarsiorneran­nik, selskabinillu mikisunik, allamiut angallataannik attartortussanik, eqquissaaq. Taa­matut naliliipput aalisarnermi oqaaseqartut arlallit, taakkualu kinaassutsitik isertuukku­suppaat pisassinneqarnissamik qinnuteqar­tut ilagimmatsik, isornartorsiuinertillu pis­sutigalugu mattunneqarnissartik ersissutigi­gamikku.

Qinnuteqartut ilaasa Hans Mathiassenip Arctic Ravenimeersup utaqqineq qatsulluinnarpaa. Taanna oqarpoq angallat atugas­sartik maannakkorpiaq Savalimmiuniit maanngartoq.

- Pisassinneqassagutta angallat avaleraa­sartoorniarnissamut piareersarneqassaaq tunumiunillu inuttassarsiussaagut. Aalisarnerup aallartinnginnerani sorpassuit inissin­neqaqqaassapput, aalisarnerlu ajalusoorpat aningaasarpassuarnik annaasaqaratarsin­naavugut, taanna oqarpoq.

Pisassiissutit kinguaattooqqiffiusut Sermitsiami kingullermi saqqummersumi atuaruk:

Powered by Labrador CMS