katersortitsineq
Avalannginninni piareersarluaqqissaarit
SAR-imik ujaasinerit qanoq pinngitsoortinneqarsinnaaneri pillugit marlunngornermi Nuummi politeeqarfimmi tusagassiortunik katersortitsisoqarpoq
- Inuit angalasartut piareersarluarsimasaraluarpata, SAR-imik ujaasisarnerpassuit Nunatsinni pisartut pinngitsoorneqarsinnaagaluarput.
Kalaallit Nunaanni Politiit, Issittumi Sakkutooqarfik, Imarsiornermik Ilinniarfik, peqqissutsimut kiisalu upalungaarsimanermut aqutsisoqarfik ullumi marlunngornermi Nuummi politeeqarfik tusagassiortunik katersortitsimmata ilaatigut tamanna oqaatigineqarpoq.
Angalasarnerup aallartinnissaa sioqqullugu tusagassiortunik katersortitsineq pivoq, imaatigut angalanermi isumannaassusemut ilisimasat paasissutissallu siammarterneqarnissaat tamatumunnga siunertaavoq, aamma qanoq ililluni SAR-imik annaassiniartoqarnissaa pinngitsoorneqarsinnaanersoq, imaluunniit SAR-imik annaassiniaanermik nalaataqassagaanni qanoq iliortoqassanersoq.
Nunatsinni siornaannaq 91-eriarluni SAR-imik ujaasisoqarpoq. Ujaasinerit 20-t Nuummeersuupput, tassanilu illoqarfiit akornanni ujaasinerit amerlanersaapput.
Avalannginnermi piareersimalluarnissaq
Umiatsiamik angalaarnissamut piareersarneq taama pisariutiginngitsoq erseqqissaatigineqarpoq:
- Kisianni ilaasunut tamanut annanniutinik vesteqarnissaq, nerisassat, imeq, VHF-radio, oqarasuaat angallattagaq, iputit, atisat oqortut kiisalu ikittaateqarnissaq pingaaruteqarpoq, Johan Westen, Nuummi politiineersoq oqarpoq.
Kisimiilluni angalasannginnissaq pingaaruteqartoq aamma oqaatigineqarpoq, taamatullu aamma ikinngutit ilaquttallu sumut angalalernerluni ilisimatinneqartarnissaat.
Pinngitsoortinneqarsinnaagaluartut
- Aavariartut sumut sangunerlutik paasissutissiissutiginagu ujaarineqalertut naammattoortarpagut. Aamma silap ajornerani misiliisunik, imaluunniit sikoqarfiusunut angalasunik naammattuisarpugut. Tamakku ujaasinerit pinngitsoorneqarsinnaagaluarput.
- Radiokkut silap qanoq innissaanik tusarnaarit, nittartakkakkut silap qanoq innissaanik misissuigit, sumukarniarnerlusi ilisimatitsissutigisiuk, avalannginnissinnilu piareersarluaritsi, tusagassiortunik katersortitsinermit tamanna oqaatigineqarpoq.
Ujaasinerit minnerusut millionit koruunit affaanik akeqarsinnaasartut ilisimatitsissutigineqarpoq.
Tusagassiortunit katersortitsinermit assit uani ataani takukkit