Avalak: Nunatsinnut uternissaq ima pilerinarnerulissaaq
Kalaallit Danmarkimi ilinniagaqartut nunatsinnut uteraangata, meerallit meeqqatik paaqqinnittarfinni inissaqartinneq ajorpaat. Tamanna aaqqiivigineqarnissaa Avalap aaqqiivigerusuppaa
Danmarkimi ilinniareerluni nunatsinnut uternermi meeqqat paaqqinnittarfiini inissaaleqisarput, paaqqinnittarfinnullu utaqqineq sivisusinnaasorujussuusarluni.
Tamanna Avalammit ajornartorsiut nalunnginneqarluarpoq, Avalak Danmarkimi ilinniariartut peqatigiiffigaat. Taamaattumik ajornartorsiut peqatigiiffiup aaqqiivigerusuppaa.
- Januarimi septembarimilu ataatsimeeqateqarnerni oqallinnikuuvugut meeqqat paaqqinnittarfiini inissaqartitsisinnaannginneq ajornartorsiutaasoq. Tassami ilinniartut nunatsinnut uternissaannut qaammatit arfiniliinnanngoraangata aatsaat pisortatiguunngitsumik allatsittarput. Taamaattorli taamatut allatsinneq iluaqutaaneq ajorpoq, kommunimummi saaffiginnittoqarsinnaasarmat. Nunatsinnummi uternermi inuit allattorsimaffiannut allatsinnermi aatsaat meeqqat paaqqinnittarfiinut allatsittoqarsinnaasarpoq, Avalammi siulittaasoq, Hans Peder Kirkegaard oqarpoq.
Utaqqineq sivisooq
Ukiuni marlunni pingasuniluunniit sivisutigisumik utaqqisoqartarpoq illoqarfiit ilaanni. Tamannalu iluarsiivigineqarnissaa Hans Peder Kirkegaardip iluarsiivigerusuppaa.
- Angunianngilarput Danmarkimi atuartut pitsaanerusumik sullinneqassasut, kisiannili siunersuutigivarput nunatsinni najugallit assigalugit allatsissinnaasoqarnissaa angorusukkaluaratsigu. Taamaasilluni pitsaanerusumik ajornannginnerusumillu nunatsinnut angerlartoqartalissagaluarpoq, Avalap siulittaasua oqarpoq.
Hans Pederip neriuutigaa politikkerit Avalap siunersuutaat tusaajumaaraat.
- Neriuutigaarput Inatsisartuni partiit tamarmiusut isumaqatigiillutik Avalap siunersuutaa tigujumaaraat, taamaasilluni ilinniagartuut ilinniareerlutik ajornannginnerusumik nunatsinnut angerlartalissagaluarmata, Hans Peder Kirkegaard oqarpoq.
Sermitsiaq.AG sisamanngormat allappoq tassani IA-mi siulittaasoq Kuupik Kleist Inatsisartuni oqalugiaammini oqarmat partiit tamarmiusut nunatsinnit aallartartut amerliartunnginnissaat pillugu suleqatigiittariaqartut.
- Qaamanerusumik suleqatigiittariaqarpugut kalaaleqatigut nunatsinnit nuuttartut amerliartunnginnissaat ataatsimoorluta suleqatigiissutigisariaqaratsigu, IA-mi siulittaasoq oqalugiaammini oqarpoq.