AVALAK
AVALAK nunatsinni takussaanerulerusuttoq
Ilinniartut kattuffiani siulittaasunngorlaap, illiniartut aallarterlaat Danmarkimut tikinnerini pissarsiaripallakkusuppai. Taakkuali tikinnerini inissaqartinneqarnissaat aamma sulissutigerusuppaa.
Lars-Peter Fuglesang AVALAK-mi siullermeerutaasumik siulittaasutut qinigaavoq. Siulersuisulli suli inissiterneqanngitsut, kattuffik sinnerlugu inuit 1.000-t sinnillit saanni Nunatsinnut Juullimut Inuulluaqqusisoqarnerani, taanna oqaluttuartussanngorsimavoq.
- Oqalugiaatissaq eqqaamaniarlugu sungiusarluarsimavunga. Oqaaseqartarfimmiileramalu eqqaamasinnaasimanngilara, taanna illalaarluni oqarpoq.
Qujanartumilli pappiaraatini nassarsimavai, taamaasilluni nunatsinnut oqariartuut katersuuffiup saani atuarsinnaasimallugu.
Lars-Peter Fuglesangip siulersuisulli sinnerisa, AVALAK nunatsinni takussaanerulernissaa sulissutiginiarpaat, taamaasiornikkut kalaallit Danmarkimi ilinniarnerminnik aallartitseqqaarnerminni kattuffimmut saaffiginnissinnaalerniassammata.
Aamma atuaruk: Avalak siulittaasortaarpoq
- Danmarkimi ilinnialerlaat ilisimalissavaat taakkununnga neqeroorutitsialaangatta, taanna oqarpoq.
AVALAK-p nittartagaata ingerlateqqinneqalernissaa siullertut suliarineqassaaq, sulinerli tamaanga unitsinneqassanngilaq. Kattuffiup inuusuttut nunatsinni ilinniarnerisa nalaani toqqaannartumik attaveqarfigisalerusuppai.
- Danmarkimulli tikiinnerminni, najukkami immikkoortoqarfitsinni peqataalersinnaapput aaqqiissuussatsinnulli orniguttarlutik.
Ukiup taamaasinera, ilinnialerlaat akeqanngitsumik nunatsinnut angalasinnaajunnaarnerisa kingorna, pingaartumik ilungersunarsinnaasarpoq.
- Ukiumi siullermi nunatsinni juullisiorsinnaanngitsut artorsarpallaannginnissaat siunertarlugu arlallinnik aaqqissuussisalernikuuvugut, siulittaasunngorlaaq oqarpoq.
Isumaginninnermillu suliaqarneq pingaarnersaanngilaq. Politikkikkulli suliaqarnerit pingaarnerupput. AVALAK ataatsimeersuarnermini aalajangiuppaa, ilinnialerlaat inissaqartinneqarnissaat pingaartnertut eqqartorneqassaaq.
- Danmarkimut tikinnerini inissaqartariaqartut, isumaqarpugut. Kalaallit illui sueqatigalugit misiliinissarput, takorloorpara, taamaasiornikkut Danmarki tamakkissagatsigit, Lars-Peter Fuglesang eqqarsaatersorpoq.
Siulittaasunngortoq ilinniartoqatimi sullinnissaanut piareersimalluartutut misigisimavoq. Taanna Nuummiinnermi, ilaatigut ukiuni arlalinni illoqarfimmi matulerisutut pisortaasimagami, aqutsinermik misilittagaqarpoq. Kingornalu 35-nik ilinnialinnginnermini security-mik suliffeqarfiuteqalersimangaluarpoq
Massakkullu Aalborgimi ukiuni marlunni ilinniarnertuunngorniarfimmi ilinniartuuvoq. Tamatuma kingona nakorsaatinik atuarnissani pilersaarutigaa.