ATV-t
ATV-nut malittarisassat iluarsineqassapput
ATV-nik ingerlatsinermut malittarisassat Nunatsinnut kiisami tulluarsarniarneqalerunarput.
Assersuutigalugu qamuteralannik ingerlatsinissamut piumasaqaataanngippat, ATV-t sooq inunnit biilinik ingerlatsisinnaanermut allagartalinnit kisimi ingerlanneqarsinnaanersut amerlasuut paasisinnaanngilaat, ingammik inuussutissarsiutigalugu aalisartut piniartut aamma saavaatillit.
Sukkassutsimut killigititaq
Ingerlatsitsissutinillu nunaannarmi atuisut sukkassutsimut killigititaq akunnermut kilometerinut 30-nut killeqarnera iluarinngilaat.
Attaveqaqatigiinnermut naalakkersuisoq, Erik Jensen, paragraf 37-imut akissuteqarnermini Henrik Fleischerimut ilisimatitsivoq, ''Nunatsinni innuttaasunut piumasaqaatit sumiiffinni avatangiisinut unammilligassaasinnaasunullu naleqqussarneqarsimanissaat Naalakkersuisunut pingaaruteqarpoq''.
Qaammatip aallartinnerani apeqqut danskit angallannermut ministeriat Ole Birk Olesen peqatigalugu oqaluuserisimallugu, Erik Jensen ilisimatitsivoq, atorfilinnut suleqatigiissitamik ataatsimoortumik, Kalaallit Nunaanni biilersinnaanermut allagartanut maleruagassanik iluarsaassisinnaanermut periarfissanik misissuisussamik pilersitsinissamik isumaqatigiissuteqartoqarpoq.
Politiit inuussutissarsiortullu sulinermi ilanngunneqassapput, Erik Jensen neriorsuivoq.
- ATV-nik atuineq qamuteralannik atuinissamut piumasaqaatinut sanilliunneqassappat, Kalaallit Nunaanni angallannermut inatsit allanngortinneqartariaqarpoq. Angallannermut inatsit naalagaaffiup susassaqarfigaa, Erik Jensen akissummini ilisimatitsivoq.
Tulluarsarneqanngitsoq
Angallannermut inatsit danskinit issuaannarneqarsimasoq ersarippoq, nunaannarmullu immikkuullarissumut tulluarsarneqarsimanani, tamannalu amerlasuunit isornartorsiorneqarnikuuvoq.
Henrik Fleischerip aamma ATV-t sisamanik assakaasullik Nunatsinni qanoq amerlatiginersut apeqqutigaa. Akileraartarnermut Aqutsisoqarfiup naatsorsugai malillugit qamutit assakaasullit nunakkoorutit minnerit 332-iupput. ATV-t nammineq pigisat qanoq amerlatiginerinik Akileraartarnermut Aqutsisoqarfik naatsorsuineq ajormat taakku amerlassusaat ilisimaneqanngilaq, akissummi tamanna allaqqavoq.