Qeqqata Kommunia
ATV-nut aqqut inuussutissanik atuilluarnissamut aqqutaasoq ilimagaa
Marius Olsen (S) Sisimiut aamma Kangerlussuup akornanni ATV-nut aqquteqalernissaa qilanaarutigaa, umimmaat- aammalu tuttuuteqarfinnik kiisalu naasunik paarnanillu niuernissamik periarfissitsisinnaasoq
Sisiumut aamma Kangerlussuup akornanni ATV-nut aqqut septemberip qaammataani Sermitsiaq.AG-kkut saqqummiunneqartoq pisuussutinut uumassussilinnut atuilluarnissamut aqqutaassaaq.
Qeqqata Kommuniani Pisuussutit Uumassusillit pillugit ataatsimiititaliap siulittaasua Marius Olsen (S), taamatut neriuuteqarpoq.
- Sisimiut Kangerlussuullu akornani ATV-nut aqquteqalernikkut taakku akornanni akikinnerusumik assartuisoqarsinnaalissaaq. Assersuutigalugu Kangerlussuarmi neriniartarfinnut kapisilinnik tunisisarnikuuvunga, kisiannili kapisillit Sisimiuniit Kangerlussuarmut timmiasartumik nassiunnerinut kilomut 20 koruuninik akiliisariaqartarnikuullunga. Soorunami neriniartarfinnut, kapisilinnik pitsaasunik amerlanerusunik perusukkaluartunut, tamanna akitsorsaataasarpoq, Marius Olsen (S) oqarpoq, taamaattumillu ATV-nut aqqut pilersinneqalermat nuannaarutigalu.
Qeqqani pisoqangaatsiarpoq
Taassuma nuaannaarutigaa kommuunimi inuussutissat tungaatigut suliniuteqarluartoqarnera.
- Qeqqata Kommuniani pisuussutit uumassusillit pillugit suliniutit pitsaasut arlaqartut qujanartumik ingerlanneqalereerput. Piniartortagut nioqqutissanik nutaanik, soorlu qeqqussanik panertitanik misileraallutillu saarullinnik misiligummik panertitseqqittalerput. Piniagassat nutaat, soorlu avaleraasartuut imartatsinnut takkussuutilerput. Aalisakkerivigut saarullinnut ‘uumatitsivinnik’ misileraaleruttorput. Niuertafinni nerisassat nutaat, soorlu pizza umimmaap neqaanik akuugaq, umimmammillu pølsit nioqqutigineqartalernikuupput, taamatullu neriniartarfiit kalaallit nerisassaataannik sassaalliinissaminnut pikkorissigaluttuinnarlutik, Marius Olsen oqarpoq.
Taassuma taamaallaat nunakkut ingerlanissaq ajornarnerunera kisiat ajuusaarnartoqartippaa.
Aqquteqalerpat immaqa tunisassiornerulerneq
- Sisimiut Kangerlussuullu akornani ATV-nut aqquteqalerneratigut, kingornalu aqqutivimmik aqquteqalerneratigut nuna atorluarnerulersinnaassavarput. Taamaalilluta nunap timaani pisuussutit atorluarnerulersinnaavagut. Nunap atorluarnerunissaa eqqarsaatigalugu, umimmaateqarfinnik tuttuuteqarfinnillu pilersitsisinnaavugut. Taamaattorli ATV-nut aqquteqalernikkut, naasut paarnallu atorluarneqarsinnaalissapput.
- Aappaattut, umimmannik neqaarniartut sinerissamut nioqqutissiorusukkaluartut ilisimavara. Taamatuttaaq ATV-nut aqqut atorlugu aalisakkanik nutaanik Sisimiuniit Kangerlussuarmut assartuisitseriarluta, nunanut allanut timmisartumik assartuisitsisalernissarput neriunarpoq, taanna taama neriuuteqarpoq.
Aamma atuaruk: Kommuni 15 millioninik nalilimmik ATV-nut aqquserniulertoq