Atuisut nannunut appanullu pilersaarusiornernut peqataatinneqartut

Sapaatip-akunnerani kingullermi ilaatigut Namminersorlutik Oqartussani aamma Pinngortitaleriffimmi sulisut atuisut peqataatinneqarnerulersillugit aqutsinermut pilersaarusiornissamut pikkorissarnermut peqataapput.

Periusissiaq tulluartoq
Aalisarnermut piniarnermullu naalakkersuisoqarfiup periusissiaq nutaaq piviusunngortinniarlugu sulissutigilereerpaa.

- Sulianut ingerlateriikkatsinnut tulluarpoq, piniarnermut immikkoortortami pisortaq, Amalie Jessen naqissusiivoq.

Periusissiaq 'aqutseriaatsimik ingerlaavartumik' taaguuteqarpoq, naatsumillu oqaatigalugu pilersaarummut anguniakkat aalajangiunneqarnerini aammalu ingerlaavartumik pilersaarutit iluarsineqartarnerinut atuisut ilanngutereerneqartarnissaat siunertaavoq.

Atuaruk: Atuisut biologillu aqutsinermut pilersaarusioqatigiissapput

Aqutsinermut pilersaarutinut ilanngunneqartassasut
Naalakkersuisoqarfik maanna nannunut aqutsinermut pilersaarummik suliaqarpoq, qaammammi kingullermilu aalisarneq piniarnerlu pillugit isumaqatigiinnerup kingorna, appanut tunngasumik suliaqarneq aallartinneqarpoq.

- Ingerlaavartumik aqutsinermut pikkorissarneq sulianut ingerlateriikkatsinnut tapiliutaalluarpoq, Amalie Jessen oqarpoq.

Atuaruk: Saarullitassat amerlineqarnerat akeqarsimavoq

Periutsimut tapersiineq
Nannut pikkorissarnerup ingerlanerani sulinermi assersuutitut atorneqareerput. Tassani piniartut, biologit, naalakkersuisoqarfiit, takornariartitsisartut aamma peqatigiiffit kajumissutsimik suliaqartut aqutsinermut pilersaarusiamut anguniakkat aalajangeeqataaffigissagaat eqqarsaataavoq. Atuutilerpallu illuatungeriit ataatsimoorlutik aamma ingerlaavartumik pilersaarut suliarisassavaat.

- Periutsip taassuma atorneqarnera tamanit nuannaarutigineqartoq malugivara, Amalie Jessen oqarpoq.

- Oqallikkumassuseq assut annertuvoq.

Atuaruk: Nunarput qilalukkanik aarrinillu piniarnerminut isornartorsiorneqartoq

Atuisut ilisimasaat
Ingerlaavartumik aqutsineq atuisut peqataatinneqarnerulernissaanik politikkikkut anguniakkanut aamma tulluartuuvoq. Tassanilu naalakkersuisoqarfik suliniutinik arlalinnik ingerlataqareerpoq.

Ukiuni arlaqartuni Avannaani aalisartut piniartullu takusatik nalunaarsortarpaat. Nanortallillu eqqaani umimmaat amerlassusaat nakutigineqarnerat systemimut ilanngunneqarnikuuvoq.

- Paasissutissat aqutsinermut pilersaarutini atussagutsigit, uppernarsarluakkamik aamma assigiiaartumik nalunaarsuineq pingaaruteqarpoq, Amalie Jessen naqissusiivoq.

Najukkamit peqataasitsineq
Siunissami aqutsinermut pilersaarutit atuisunik oqaloqateqarnernik iluaquteqarumaartoq, taanna isumaqarpoq.

- Najugaqartunik peqataatitsineq annertunerulissaaq, tamannalu iluaqutissaalluinnarpoq, Amalie Jessen naliliivoq.