Atuisut arlallit Tele-Post naammangisimaanngilaat

Namminersorlutik Oqartussat ingerlatseqatigiiffiutaat Tele-Post atuisut naammangisimaartinnissaannik ajornartorsiuteqarpoq. Ajorsiartorpq, pisortaaneq Kristian R. Davidsen oqarpoq.

2017-imi upernaakkut arlaleriarluni attaveeruttarsimaneq Tele-Postimut eqquinerluppoq. Atuisut misissuinermi ukiup siulianut sanillersuunnerani ingerlatseqatigiiffiup kiffartuussinera naammangisimaannginnerullugu oqaatigaat.

Ukiumoortumik misissuineq

Atuisut naammangisimaarinninnerat pillugu Tele-Post ukiut tamaasa ingerlataqartarpoq. Misissuinermilu kingullermi ukiumut naatsorsuutini ilanngunneqartussami appariaateqarsimaneq takutinneqarpoq.

Atuisulli naammangisimaarinninngikkaluartut nassuiaatissaqarmat, Tele-Postip pisortaanera isumalluarpoq

- Ingerlatseqatigiiffiup oqaluttuarisaanerani aningaasaliinerit annerit ilaat suliarileruttorpagut. Tassunga atatillugu upernaarmanna ilimaginngisatsinnik arlaleriarluta attaveerussimavugut, tamanna soorunami ajusaarnartipparput, pinngitsoorneqarsimasinnaangunanngilarli, Kristian R. Davidsen Sermitsiaq.AG-mut erseqqissaavoq.

Taamaammat ajortoqarpoq

Nuummiik Aasiannut imaatigut kabeliliinermi internettimillu iluarsartuussinerit, bussi ingerlatillugu motoriata taarserneqarneranut assersuutaasinnaavoq, taanna nassuiaavoq.

- Taamatut suliaqartilluni ulluinnarmi ingerlatsinermut eqquinissaa pinngitsoortinneqarsinnaaneq ajorpoq, pisortaaneq upernaaq suliaqarnermi iluaqutissat tikkuarlugit oqarpoq.

- Imaatigut kabelip nutaap atulersinneqannginnerani innuttaasut 37 procentii naammaginartumik internettimut attaveqaateqarsimapput.
Massakkut inuttaasut 80 procentii angullugit, internetti 30 M/bit angullugu sukkassusilimmik neqerooruteqarfigaagut, tassa Nuummiik avannamut Ilulissat tikillugu illoqarfiit atuisullu nutaaliorfigineqangaatsiarlutik, Tele-Postip pisortaanera oqarpoq.

Aningaasaliinerit annertuut

Tele-Postip suliffeqarfia tamakkerluni attaveqaqatigiinnermik nutarsaanerup nalaani pataajutsumik kiffartuussinissamik unammilligassaqarsimavoq.

Ingerlatseqatigiiffik 2017-imi 370 million koruuninik aningaasaliissuteqarsimavoq ukioq mannalu 270 million koruunit atorneqassapput.

- Qujanartumik arlalinnik suliniuteqarpugut atuisut iluaqutigisinnaasaannik. Qularutiginngilara atuisunut pitsanngorsaalluta maanna ingerlatagut ukiup tulliani atuisut naammagisimaarinninnerulernerannik kinguneqassasoq, Kristian R. Davidsen erseqqissaavoq.

Powered by Labrador CMS