avatangiisit pinngortitarlu
Atuartut videoliaat 13-it
Nunami tamarmi atuartut eqqaaviit atornissaannik aammalu Kalaallit Nunaanni avatangiisit pinngortitallu paarineqarnissaannik videoliorput
Atuartut avatangiisivut paarerusuppaat, avatangiisinut pinngortitamullu Naalakkersuisoq Kim Kielsen tusagassiorfinnut nalunaarutikkut oqarpoq, tassuuna paasissutissiissutigalugu erinarsuummik paasisitsiniummik Qujanaq atuartut videoliaannik 13-inik tigusaqarsimalluni, erinarsuutikkut tassuuna kikkut tamarmik eqqaavinnik atuisut aammalu Kalaallit Nunaanni avatangiisinik pinngortitamillu saligaatsitseqataasut qutsavigineqarlutik.
Atuartut erinarsuummik paasisitsiniummik Qujanaq pisaanerpaamik videoliornermik unammisinneqarput, videonillu ataavartumik nassiussuisoqarpoq, tusagassiorfinnut nalunaarummi allassimavoq.
– Julie Berthelsen peqatigalugu ajugaasut toqqarnissaat qilanaaraara, Kim Kielsen oqarpoq.
– Erinarsuummik paasisitiniummik Qujanaq videoliornissamik kajumissaarut atuartut malimmassuk tamassuma aamma takutippaa meeqqat avatangiisit pinngortitarlu paarerusukkaat. Ajugaasut septembarip naalernerani toqqarneqassapput, taamaattumik unamminermi suli peqataasoqarsinnaavoq, taanna paasissutissiivoq.
– Tamatuma saniatigut malugisimavarput unamminitsineq soqutigineqartorujussuusoq, facebookimilu quppernerput ullut tamaasa alliartorpoq. Manna tikillugu likes-inik 2350-inik pereersimavugut, amerlaqaallu. Aamma soqutiginnittunit allanit videolianik nassinneqarsimavugut, Kim Kielsen oqaluttuarpoq.
Avatangiisinut Pinngortitamullu Naalakkersuisoqarfik unammisitsinermi saniatigut Maniitsumi Nuummilu tusarnaartitsinernit nipilersukkamik videoliorsimavoq, erinarsuummi kikkut tamarmik eqqaavinnik atuisut aammalu avatangiisinik pinngorititamillu saligaatsuutitsisut qutsavigineqarlutik.