Atuartut Sisimiuneersut oqaluttuarisaanermi Kalaallit Nunaanni pissartanngorput

2018-imi Historiedystenip ingerlanneqarnerani, kalaallit unammisinneqarnerannut Sisimiuni Minngortuunnguup Atuarfianeersut 7 b-it ajugaapput. Klassi suliaqarnikkut inuiaqatigiinnikkullu nukittorsimaannaratik, Danmark-imut angalasussanngorput.

Sisimiuni Minngortuunnguup Atuarfianeersut 7 b-it

Videoliornerminni pitsaasumik peqqissaartumillu sulilluarsimapput. Kunngikkormiut silarsuaannut pulalluarlutik. Isiginnaagassiassamut tunulequtaliorlutik, filmiliorlutik killuillutillu. Utaqqisimanerlu sivisusimavoq. Ilaannut sivisuallaarluni. Kiisami sapaatip akunnera kingullermi pingasunngornikkut klasselærer Malte Nyholt nuannerluinnartumik nutaarsiassaateqarluni 7 b-it inaannut iserpoq, tassa tusarnissaannik neriuutigisimasaat; historiedystenimi ajugaasimapput. Suliaqangaatsiarnerat imminut akilerpoq. Qeqqata Kommunia tusagassiuutinut nalunaarummi ilisimatitsivoq.

- Videoliaat ima tigulluarneqarsimatigaaq, ajugaasimanerannik nalunaarfiginerat nuannerluinnarluni. Ullut tamaasa tusagaqarsimanersunga qilanaaqalutik aperisarput, 7 b-inut klasselære Malte Nyholt oqaluttuarpoq.

- Tajjii tupinnaq!. Suliaqangaatsiarsimavugut, klassillu arlaqartut ajugaaffigalutigit, klassimi atuartut assigiimmik oqarput. Isiginnaagassiorneq aamma nuannerluinnarsimavoq, filmiliortoqarneranilu illakusunnerit pisarlutik, tamanna aamma atuartunit isumaqataaffigineqarpoq.

Klassi tunniusimasoq

Unammisitsineq Frederiksborg-imi Det nationalhistoriske Museum-imit ingerlanneqarpoq, Naalagaaffeqatigiiffimmiillu tamanit klassit arlaqartut peqataallutik. Historiedysten marlunnut aggulugaavoq. Unammineq siulleq online-mik nalorsitsaarinermik naammassineqartarpoq. Klassillu angusarissaarnerit ajugaanniutivinnermut ingerlaqqittarlutik, tassanilu qulequttat marluk qinigassaasarlutik. 7 b-init kingulleq toqqarneqarpoq, tassaalluni: ’På familieophold med Frederik den 8.’

- Suliassiissut tassaavoq ilaqutariit Fredensborg-imi aasaanerani najugaqarneranik isiginnaagassiorneq, tassani Frederik den ottende-p qatanngutaa europamiut kunngikkormiuanut katinnera pineqarluni. Videop suliarineqannginnerani arlalippassuarnik paasiniagassaqarpoq. Kunngikkormiut sulerippat?. Suna eqqartorpaat?. Kunngikkormiut assigiinngitsut imminnut suna immikkuullarissutigivaat?. Il.il., Malte Nyholt oqaluttuarpoq.

1880-ikkunni kunngikkormiut Illussaarsuarmi Fredensborg-imi aasaanerani katerisimaarnerat pillugu klassi filmiliortussaavoq. Videolu ima taaguuteqalerpoq ’ Sommerferie hos Europas svigerforældre.

- Isiginnaagassiassamut tunulequtit nammineq sanaartorpagut, nunat assigiinngitsut misissorpagut kunngikkormiullu qanoq ittuuneri pillugit paasiniaallutik. Atisat, pinnersaasiat, nerisassat allallu atuarfimmut nassanngikkutsigit nammineq aamma sanasarpagut, 7 b-imi atuartut oqaluttuarput. Video minutsinik arfineqpingasunik sivisussuseqartoq namminneq filmiliorlugulu killorpaat.

-Atuartut takutikkusutaannut tamanut inissaqartitsiniarneq ajornakusoorsimavoq, Malte Nyholt oqarpoq, nangillunilu, septembarip aallaqqaataanit unammineq aallartissimasoq, klassimilu tiimeqartitsinerini tamangajalluinnarni piareersaanermut filmiliornermullu atorneqarsimallutik.

Ajugaasunut akissarsiaq, 7 b-init pissarsiarineqartoq tassaavoq, Frederiksborg Museum-imit aaqqissorneqartoq Danmark-imut angalaneq – tamaat akilerlugu.

Eqqugassaq annerpaaq

Ajugaasumik toqqaanermi Katersugaasivimmit erseqqissaatigineqarpoq, oqaluttuamik oqaluttuarineqarluartumik, pissanganartumik imaqarluartumillu klassi suliaqarsimasoq, taassumalu klassip namminersorluni sulisimaneranut, peqqissaartumillu oqaluttuarisaanermut paasisassarsiorsimaneranut ersersitsisuusoq.

Klassip angalanermini arlalippassuarnik misigisaqarnissani qilanaariinnassavaa, ilaatigut Illussaarsuarmut Frederiksborg, Det nationalhistoriske museum, København-imilu sumiiffinnut pissanganartunut arlalinnut pulaartarnissaq. Angalanissaq suli ullulerneqanngilaq, ukiumili nutaami februaarip nalaaniissaaq. Klassi tamarmiulluni qilanaartorujussuuvoq.

- Atuartut sinnerlugit klasselæretut tulluusimaartorujussuuvunga, ajugaasimanerallu pissusissamisuuginnarpoq. Neriuutigaara ikioqatigiilluni angusaqarluartoqarsinnaanera ilikkarsimassagaat. Neriuppunga upperalugulu, klassi tamarmiulluni suliassatigut minnerunngitsumillu inooqataanikkut nukittorsimassasoq, tamannalu ungasinnerusoq isigalugu klassimut eqqugassaq annerpaajuvoq, Malte Nyholt naggasiivoq.

Powered by Labrador CMS