Atuartut nuutsinneqarnerat angajoqqaanit nuannaarutigineqarpoq

Atuartut pingasut Kulusumiit angajoqqaavisalu kissaatertik eqquutsippaat Tasiilami Alivarpimi 10. klassimut atualernissaminnut tigutimmata.

Ukioq manna taamaallaat atuartut pingasuupput nunaqarfimmi 10. klassimi atuartussat, angajoqqaajusullu isumaqarlutik ikippallaartut. Taamaammat tamarmiullutik Tasiilamut nuunneqarnissartik qinnuteqaatigisimavaat.

- Nuannerpoq angajoqqaat kissaataat naammassisinnaagatsigit ilutigalugulu meeqqanut atuarfiup aningaasatai pitsaanerpaamik atorsinnaallutigit, Meeqqanut Ilaqutariinnut Atuarfeqarnermullu pisortaq Søren Valbak tusagassiutinut nalunaarummi oqarpoq.

Tasiilap nunaqarfiini atuartut sinneri aamma illoqarfimmi 10. klassissapput tassani atuartunut angerlarsimaffeqarpoq inuusuttunik siullermeerutaasumik angajoqaatik qimallugit najugaqartussanik isumaginnissinnaasunik.