Qeqqata Kommunia

Atuartut iPadsinik tuniorarneqartut

Sapaatip akunneri sisamat ingerlaneranni Qeqqata Kommuniani meeqqat atuartut tamarmik iPadimik tunineqassapput

Qeqqata Kommunia meeqqanut atuartunut iPadinik agguaassaaq

Qeqqata Kommuniani meeqqat aturfiini meeqqat atuartut tamarmik iPadimik tunineqassapput. Sapaatit akunneri sisamat ingerlaneranni meeqqat tamarmik iPadeqalersimassapput. iPadit atuarnermi ilinniakkerinermilu atorneqartassapput.

Qeqqata Kommunia nalunaarpoq.

iPads-it siulliit januaarip 30-ani 31-anilu Sisimiuni atuartunut agguaanneqassapput.

Kangerlussuarmi, Sarfannguani Itillimilu atuartunut sapaatip akunnera 6-imi iPads-inik agguaassisoqassaaq. Maniitsumi atuartunut sapaatip akunnera 7-imi agguaassisoqassaaq kiisalu Atammimmi, Napasumi Kangaamiunilu atuartunut sapatip akunnera 8-mi agguaassisoqassalluni. Pissutsit assigiinngitsut teknikkimut tunngassuteqartut patsisaallutik piffissani assigiinngitsuni illoqarfinni nunaqarfinnilu iPads-inik agguaassisoqassaaq.

Ilinniartitsisut novembarip qaammataani iPads-inik agguaassiffigineqarput, malitsigisaanillu pingasoriarlutik pikkorissartinneqarlutik.
iPadi atuartitsinermi qanoq atorneqartarnersoq pillugu ilinniartitsisut pikkorissartinneqarput. Nalunnguarfiup Atuarfiani ilinniartitsisup Jørgen Peter Labansen-ip oqaatigaa.

- Atuartitsinermi iPads-inik atuilernikkut, atuartitsinerup soqutiginarnerulernissaanut, atuartullu eqqarsaatigalugit periarfissat assigiinngitsut ammaanneqarput. Assersuutigalugu qarasaasialeriffimmi qarasaasianik ilinniartitsisoq inniminniinani, atuartut internetsi aqqutigalugu suliaqarsinnaanngussapput, soorluttaaq iPads-i atorlugu atuartut inaanni atuartut kukkunaveersaartinneqalersinnaassasut. Tamatuma saniatigut atuartut ataasiakkaat pisariaqartitaannut naapertuuttumik atuartitsinerup naleqqussarneqarnissaanut sakkussatsialaavoq, Peter Labansen oqarpoq.

Periarfissiineq pitsaasoq
Meeqqat atuarfiini atuartitsinerup pitsanngorsarneqarnissaanut, Qeqqata Kommuniani aamma Kommune Kujallermi atuartunut tamanut periarfissarititat qulakkeerneqarnissaannut pitsanngorsaataasussaalluni, atuartunut iPads-inik agguaassinikkut qarasaasiaqarnikkut annertuumik kivitsinermut ilaavoq. Kommune Kujallermi atuartut ukiup ingerlanerani iPads-inik agguaassiffigineqassasut naatsorsuutigineqarpoq.

iPads-ip atuartitsinermi atorneqarnissaanut iPads-i assigiinngitsutigut nutaanik periarfissanik ammaassinerata saniatigut, atuartut atuarfimmi angerlarsimaffimminnilu iPad-i atorlugu internetsersinnaanngussapput. Kommunimi atuartut aallaqqaammut atuarfiup attaveqaataanut attavinissinnaassapput. Upernaap ingerlanerani illoqarfimmi nunaqarfinnilu attaveqaatit piariissangatinneqarput, piareerpatalu Nunatsinni nutaarluinnartut periarfissaalerumaartumik atuartut angerlarsimaffimmini internetsersinnaalissallutik.

Qeqqata Kommunia Kommune Kujallerlu
Aningaasaateqarfik Villum Fonden 17 mio. koruuninik akuersissuteqarnermigut, Qeqqata Kommuniani Kommune Kujallermilu atuartut ilinniartitsisullu iPads-eqalernissaat qulakkeerpaa. Kommunit taakku marluusut ukiumut ingerlatsinikkut 3,5 mio. koruuninik aningaasartuutissanik immikkoortitsipput, taamaalillutillu atuarfinni qarasaasialerisussanik atorfinitsitsinissanut, apps-inik pisinissamut, iPads-inut ajoqusersimasunut taartissanik pisiniassaq, piffissallu ingerlanerani nutaanngilisunut taartissanik pisinissat pisinnaalerlutik, aammalumi internetsimik atuinermi akit qaffakkaluttuinnartut eqqarsaatigalugit.

Powered by Labrador CMS