unammisitsineq
Atuartut Facebook-ikkut erinarsornermik unammisinneqarput
Naalakkersuisoqarfik nunami tamarmi atuartunut unammisitsivoq. Ajugaasunut akissarsiassat 10.000 koruuniupput
Eqqaaviit atornissaannik Qujanarp erinarsuutaa erinarsorsiuk imaluunniidt nipilersorsiuk - atuarfimmi klasseqatinnut 10.000 koruuninik akissarsiassaqarpoq.
Nunatsinni atuartunut tamanut taamatut kaammattuivoq Avatangiisinut Pinngortitamulluk Naalakkersuisoqarfik.
Eqqaaviit atortarsigik
Eqqaaviit atortarnissaannik paasisitsiniaanermi Qujanamik erinarsuut, Julie Berthelsenip erinarsugaa tusaqqoornartuuvoq, Avatangiisinullu Pinngortitamullu Naalakkersuisoqarfiup neriuutigaa nunatsinni atuartut tamarmik peqataassasut.
– Erinarsuut torrallataaqaaq, eqqaaviit atorneqartarnissaannik Nunattalu paarilluarneqarnissaanik oqariartuussisoq. Tamassuma nuna tamakkerlugu erinarsorlugu siammarsarneqarnissaanut meeqqat ikiortigerusuppavut, Avatangiisinut Pinngortitamullu Naalakkersuisoq Kim Kielsen oqaluttuarpoq.
Atuarfiit tamarmik
Nunami tamarmi atuarfiit tamarmik Qujanap tuluujuinik nassinneqassapput, ilanngullugit cd erinarsuummik taassuminnga imalik, unammisitsinerullu qanoq ingerlanissaanik ilitsersuut.
Malittarisassat ajornanngillat. Erinarsoqatigiinnik amerlasuunik ikittunilluunniit erinarsortoqassaaq video-mut immiullugu, taannalu Qujanamik paasisitsiniaaviaup Facebook-imi qupperneranut ilillugu. Taamaasilluni unamminermut peqataasoqassaaq.
Septembarimi video-ni Facebook-imut nassiunneqarsimasuni pitsaanerpaaq toqqarneqassaaq. Atuaqatigiit ajugaasut 10.000 koruuninik akissarsissapput. Aningaasat klassimi ataatsimut sammisaqarnermut atorneqassapput.
Nunatta pinngortitarsua alutornartoq
Kim Kielsenip neriuutigaa meeqqat isumaliullaqqissasut.
– Pineqarpoq eqqaaviit atormeqartarmnissaat Kalaallillu Nunaata paarilluarnissaa. Tamanna video-kut takutinneqarniassaaq. Taamaattumik neriuppunga nunatsinnik alutornartumik eqqaavigineqanngitsumik video-lianik pissanganartunik alutornartunillu takujumaarluta, Kim Kielsen oqarpoq.
Julie: Meeqqat erinarsullaqqeqaat
– Nalinngilara kalaallit meerartaat erinarsullaqqissuusut. Tamanna takutipparput TV2-mi All Stars-imik unamminermi ajugaagatta. Qularutiginngilaralu meeraretavut pinngortitarput illersorusukkaat Nunattalu paarilluarneqarnissaanut peqatarusuttut, Julie Berthelsen oqarpoq.