Meeqqat pisinnaatitaaffii
Atuartunut sakkussat nutaat
Meeqqat pisinnaatitaaffiinut tunngassuteqartunik atuartitsinermut sakkussanik nutaanik atuartut pinnatassinneqassapput, tamanna Nakuusamit suliarineqarpoq
Sapaatip akunnerata tulliani atuarfiit ukioq atuarfiusoq nutaaq ammarlugu aallartissavaat.
Atuarfiit meeqqat pisinnaatitaaffiinut tunngassuteqartunik atuartitsinermut sakkussanik nutaanik pinnatassinneqassapput, Nakuusallu ilinniartitsisunut tamanut innersuutigaa sakkussat nutaat atuartitsinerminni atortassagaat.
Nakuusa tusagassiutinut nalunaaruteqarpoq.
Meeqqat pisinnaatitaaffii
- Ilaatigut Meeqqat Pisinnaatitaaffiisa imarisai qanoq paasineqarnissaat taamalu qanoq saqqummiunneqarnissaasa nalornissutigineqartarneri naammattoortuartarparput – aamma meeqqanut inuusuttunullu sullitaqartuni tamanna naammattoorneqartarpoq. Ilaasa nunani sorsuffiusuni atugarliortunilu Meeqqat Pisinnaatitaaffii atuutsinneqarnerutinniartarpaat. Kisiannili suliarpassuarni, meeqqat atuarfiini paaqqinnittarfinnilu suliassarineqartut, meeqqanut pisinnaatitaaffiit atuutsinneqarnissaat qulakkeerinniffiusussaapput, soorlu pinnguarsinnaanermut, ilinniartitaanermut allanullu pisinnaatitaaffiit, Nakuusami programlederi Arnarvaraq Jørgensen taamatut oqaluttuarpoq.
Nakuusap atuartitsinermi sakkussaliaanni ilaatigut sungiusaatini 'Toqqissisimalersitsineq' taavalu 'Majuartafiit ammut qummullu' qulequtaritinneqarput.
Kommunit atuarfeqarfiillu
- Ilinniartitsisut atuartuutitik ilagalugit sungiusaatissaannik quppersagaliaqarpoq, taassumallu saniatigut allamik aamma meeqqanut sullitaqartut allat ilinniartitsisullu atorsinnaasaannik sungiusaatinik quppersagaliaqarluni. Sulisunut quppersagaliap siunertarivaa ilinniartitsisut meeqqat pisinnaatitaaffiinik tunngassuteqartunik ilinniartitsinerminni pitsaanerusunik sakkussaannik tunniussassaqarnissaqm Nakuusa allappoq.
Ukiuni tulliuttuni Nakuusap Meeqqat Pisinnaatitaaffiinik ilisimalersitsiniarnini suli sakkortunerulersinniarpaa, tassani atuarfiit kommunellu suleqatigalugit suliniut 'Uagut ulluinnarput, uagut niperput' ukiamiit aallartinneqassammat.