qamuteralaat
Atuartartut aalajangiipput: Qamuteralaat akornutissaqanngitsut
Nittartakkatsinni atuartartutsinnut taasititsinermi qamuteralaat amerlassussaat ajorineqannginnersoq amerlavallaarnersulluunniit, affaata missaanniit ajorinngilluinnarpaat.
Ukiuni kingullerni qamuteralaat amerlassusaat ataasiinnaasimavoq: Amerliartuinnarlutik.
Naatsorsueqqissaartarfiup kisitsisaataasa takutippaa, Nunatsinni ukiut marluk ingerlanerini 1.179-nit 1.411-nut amerleriarsimasut. Amerleriaat 20 procenti.
Tamanna pissutigalugu atuartartuvut amerliaat pillugu aperisimavagut. Akissulli ersarippoq: Qamuteralaat inunnit ajorineqanngillat.
Affaasaa ajorinngilluinnarpaat
Taasisimasuni 1.900-jut akornanni 50 procentiisa missaanniittut amerlassutit ajorinngilluinnarlugit isummersimapput.
21 procentiisa pinngotitami angallatigalugit tulluarsoraat, kisiannili illoqarfinni killilersorneqartariaqartut.
19 procentiisa piniarfiusuni killilersornerusariaqartut isumaqarput kiisalu 13 procentiisa amerlavallaarsoraat.
Taasititsinerup tatiginassusaa
Taasititsineq Qamutit Nuummi siulittaasuannit Mikkel Andreasenimit, nuannaarutigineqarpoq.
- Allanut akornutaannginnerarlugit aammalu inoqatinut pinngortitamulli ataqqinnissuseqaraanni oqaatigisimasatsitut tatiginassutsitut takussutissiatut atorneqarsinnaavoq, Mikkel Andreassen oqarpoq.
Qamuteralaat illoqarfinnit peersinneqarniarnerat, Qamutit malinnaavigisimangaat, taassuma oqaatigaa.
- Meeraanerma nalaani, arlallit nuannisarniutigalugu illoqarfinni qamuterallattarnikuupput, pissuserli tamanna atorunnaariartorpoq, Mikke Andreassen oqarpoq, eqqaavaalu tassunga tunngatillugu peqatigiiffiup illuaraataa illoqarfiup avaatanut inissinneqarsimasoq.
Uumasunik tupassaarinngitsut
Taanna isumaqarpoq, qamuteralaat pinngortitami killilersorneqartariaqanngitsut.
- Akerlerissavarput illoqarfiup avataani uumasut pillugit qamuteralattoqarnissaanik killilersuisoqalissangaluarpat, isumaqarpugummi uumasunik tupassaarisuunata, soorunami uumasunik ataqinnittoqartillugu, siulittaasoq oqarpoq.
Inernerit
Kisitsisit statistikkimut attuumassuteqanngillat. Taasisitsineq taamaallaat Sermitsiaq.AG-p nittartagaani ingerlanneqarsuminngaanneerpoq, tassani atuartartut isummaminnik annissuinissamut periarfissinneqarsimallutik. Taasititsinermilu inerniulissaq ima isikkoqarpoq: