Tuesday, October 31, 2017 - 14:55

Atuartartup allagaa: Sunaana anguniagaasoq?

Assi.: Leiff Josefsen
Kalaallit Nunaanni tusagassioriaaseq equngasumik ingerlavoq. Tusagassioriaaseq ulorianartorsiorpoq

Ukioq manna tusagassiornermik ilinniarfimmi ilinniartunik nutaanik aallartittoqanngilaq. Ila sooruna? Naaguku inuiaqatigiinni qaqileriniartut. Nunatsinni tusagassiornerup silarsuaani allannguerusuttut sumiippat?

Ukiut kingulliit KNR tusagassiisartussanik arlalinnik atorfinittitsisimapput. Inuit tusagassiortutut ilinniarsimanngitsut, inuilli tv-mi saqqummernissamut pikkorittut, radio-milu sulinissamut tulluartut. Inuit ”aqqusinerminngaanniit tiguinnakkat”. Oqallisaarutissanik, inuusuttunut aallakaatitassanik il.il suliaqartinneqartut. Qulequttat qaqinneqartut amerlanerit pissanganarput soqutiginarlutillu. 

Ajornartorsiulli tassaavoq illuinnarsiorluni tusagassiineq ingerlanneqarmat, tusagassiinerlu isornartorsiuinertaqanngimmat. Taamatut tusagassiineq tulluanngilluinnarpoq ajoqutaalluinnarlunilu. 

Aallakaatinneqartut ilaat propagandamik taaneqarsinnaapput, tassaallutillu aallakaatitassiat sunniiniarsarisut. 

Assersuutitut taaneqarsinnaavoq Mudi Kramer Berthelsenip aallakaatittagaa ”Mudi tv”. Aallakaatitassiani inuit assigiinngitsut studiamut aggersarneqartarput qulequttallu assigiinngitsut oqaloqatigiissutigineqartarlutik. Ajornartorsiulli uaniippoq…Pulaartut qanorsuarluunniit eqqartuisinneqartarput illuatungilerneqaratik.

Aallakaatitassiat taamak ittut qanoq siunertaqarpat? Inuiaqatigiit suli avissaartuunnerulernissaat anguniagaava?

Tusagassiorfinni ileqqorissaarneq
Tusagassiortut tusagassiortuusaartullu ileqqorissaartussaapput. Oqaluttuat qaqinneqartut eqqortumik saqqummiunneqartussaapput. Tusagassiortutut pisussaaffeqarputit paasissutissat taakkartorneqartut eqqortuunersut paasiniassallugu. Sammisami uparuaasoqarpat pisussaaffigivat uparuarneqartoq oqaaseqartinneqarnissaa. Kisianni soorlu ingammik KNR-mi ileqqorissaarneq ilisimaneqanngitsoq.

KNR-mi aqutsisut kaammattorusuppakka ”tusagassiortuusaartunik” atorfinittitsigaangata taakku tusagassiinermut tunngasunik pikkorissarneqartassasut. Minnerpaamik ileqqorissaarneq aamma sammisassagaat kissaatiginarpoq. 

Nunatsinniuna tusagassioriaaseq qanoq ittoq kissaatigineqartoq? Suli copy/paste-tusagassiortut amerlanerit pisariaqartippagut? Imaluunniit tusagassiortut aliikkusersuinermi suliaqartussat suli amerlanerit pisariaqartippagut? Sumununa ingerlasugut? Ilumut tusagassiorfiinuku angusaqarnerorusunngitsut?

Seneste nyheder / Nutaarsiassat kingulliit