innarliineq
Atuarfiup pisortaa: Innarliineq akuerineqarsinnaanngilaq utoqqassutissartaqaranilu
Ullaatungaani USK-ip atuarfiani Nuummiittumi innarliineq akuersaarneqarsinnaanngilluinnartoq, Kommuneqarfik Sermersuumi atuarfiit pisortaata Jesper Madsenip naqissuserpaa.
Pingasunngornerup ullaatungaani USK-p atuarfiani Nuummiittumi atuartut soraarummeernerisa nalaani niviarsiara kivilerneqarsimavoq. Pisoq arlalinnit filmiliarineqarsimarpasippoq. Kommuneqarfik Sermersuumilu atuarfiit pisortaat, Jesper Madseni aallaavigalugu pisoq akuersaarneqarsinnaanngilluinnarpoq.
- Tamanna akuerineqarsinnaanngilaq, pisumulli utoqqassutissartaqarani. Taamatulli pisoqaqqinnginnissaa isumagissavarput, Jesper Madsen oqarpoq.
Suliniartitat
Taassuma piffissami qanittumi politiit naapeqatigisimavai, tassani sapaatip akunnerata tulliani suliniartussanik pilersitsinissaq isumaqatigiissutigineqarluni.
- Sapaatip akunnerata tulliani politiit peqatigalugit suliniartussanik pilersitsissaagut, tassani soraarummeertarnermut najoqqutassanik sukaterisoqassaaq, taamaalillunilu taama pisoqaqqinnginniassammat.
Atuarfiit tamarmik najoqqutassaqartut
Kommuneqarfimmi atuarfiit tamarmik soraarummeernerup qanoq ingerlanissaanik najoqqutassaqartut, atuarfinnut pisortap Sermitsiaq.AG-mut naqissuserpaa. Maleruaqqusat meeqqanut angajoqqaanilli paasissutissiissutigineqartartut.
- Atuarfinni tamani najoqqutassaqarpugut, soraarummeertoqarnissaanulli tunngatillugu meeqqat angajoqqaallu tamarmik paasitinneqartarlutik. Siunissamilu taamatut pisoqaqqinnginnissaa anguniarlugu najoqqutassat misissussavagut, Jesper Madsen oqarpoq.
Innarliinerup saniatigut atuartut pingasut atuarfimmi titartuisimapput. Titartukkalli atuartut nammineq piissagaat qinnuigineqarsimapput.