atuarfiit navianartut
Atuarfiup matunissaa angajoqqaat nuannaarutigaat
Ilulissani Atuarfik Mathias Storchimi ukiumi atuarfiusumi nutaami inini allani atuartinneqartassapput. Tamannali angajoqqaat iluarineruaat inini peqqinnissamut ulorianartuni atuartitsinermiit
Angajoqqaat oqiliallallutik anersaarulupput Ilulissani Atuarfik Mathias Storchip matunissaa Qaasuitsup Kommuniata pingasunngornermi unnukkut nalunaarutigimmagu. Angajoqqaat maajip qulingani akerliussutsimik takutitsinerminni siunnersuutit saqqummiussaat kommunep tusaarniarsimavai.
Atuarfik Mathias Storchimi atuartut atuarfiup aappaani Atuarfik Jørgen Brønlundimi kommunellu paaqqinnittarfinni atuartinneqalissapput. Tamanna pisussanngorpoq Atuarfik Mathias Storch oquk pissutigalugu peqqinnissamut navianaateqarmat isaterneqartussanngorlunilu.
Ullut taamasa niaqorluttut
- Panikka ullut tamaasa angerlartarput niaqorlullutik. Aamma qanittumi angajoqqaatut oqaloqateqarnermi atuarfimmiikkatta minutsit 45-ut missaannaagaluartut niaqorlulerpunga. Aali init taakku qitornatta ullut tamaasa nalunaaquttap akunnerpassuini isersimaffigisaraat, Ane Lone Bagger Atuarfik Mathias Storchimi atuartunik marlunnik paneqartoq oqarpoq.
Taanna aamma aaqqissueqataavoq maajip qulingani angajoqqaat akerliussutsimik takutsineranni. Tassani aaqqissuutaasinnaasunik angajoqqaat saqqummiussaqarput kommunellu pilersaarutaani taakku naammassineqarput.
- Ukiumut atuarfiusussamut nutaamut kommunep pilersaarutaa naammagisimaartorujuuarput. Inini utaqqiisaasumik inissiffiusuni atuartitsineq pisussaagaluarpoq. Kisianni tamanna ornigineruarput atuarfimmut peqqinnissamut uloriarnartumut qitornatta ornigutsittarneranniit, Ane Lone Bagger oqarpoq.
Atuarfik Mathias Storch isaterneqassaaq nutaavimmillu taarserneqarluni.