atuarfiliorneq
Atuarfittaassaap toqqavissaa aalajangerneqartoq
Kommuneqarfik Sermersooq Nuup illoqarfiata qeqqani atuarfimmik sanatitsiniarluni aalajangersimavoq, toqqavissaalu massakkut akuerineqarpoq.
Atuarfik, Nunatsinni meeqqat atuarfiisa anginersarissavaat, tassannilu meeqqat 1200-t atuartorineqarsinnaassaapput meeqqallu 400-t sunngiffimmi ornittagaannik ilaqassalluni. Atuarfik piareerpat 1. klassiniit 10. klassit akornanni tallimat arfinillillu akornanni immikkoortuinik inissaqassaaq.
Blok P toqqavigisimasaani
Inissisimavissaa nassaarineqareersimalerpoq, Blok P-llu toqqavigisimasaani toqqaveqartinneqassaaq. Tassa Nuup qeqqani Hotel Hans Egedep kommunillu allaffiata eqqannguanni inissimassaaq.
Atuarfiup Ask aamma Usk taarsissavai. Atuarfiimmi taakku marluk aserfallatsaalineqarnissaat akisuallaassasoq nalilerneqarsimavoq, nutaamillu atuarfiliorneq akikinnerujussuussalluni.
Ukioq nutaamiit atuarfeqarnermut ingerlatsiviit kommunit Namminersorlutik Oqartussaniit tigusussaavaat, tiguneranilu aningaasanik malitseqartussaammat, aningaasat atuarfiliornermut aningaasaliissutitut atorneqassapput.
Namminersorlutik Oqartussaniit millionilikkuutaat
- Namminersorlutik Oqartussat aningaasat kommuneqarfinnut agguangassaat 100 millionit koruuniupput, kommuneqarfinnilu innuttaassutsikkut anginersaangaatta agguangassarsiani amerlanernik pissarsinissarput naatsorsuutigaarput, kommunaldirektøriungallartoq Lars Møller-Sørensen oqarpoq.
Aningaasat 40 – 50 millionit koruunit amerlatigisut ukiut tamaasa tigusalernissaat naatsorsuutigineqarpoq.
Pilersaarutit malillugit ukiup tulliani sanaartorneq aallartinneqassaaq.