nersornaasiineq

Atuarfimmi pisortaq suliniuteqarnerminut nersornaaserneqartoq

Atuarfimmi pisortaq Justine Boassen, nunaqarfimmi Kulusummeersoq arfininngormat 2016-imi suliniuteqartumut nersornaammik Kommuneqarfik Sermersuup pilersissimasaani tunineqaramik killitsisimavoq

Justine Boassen (saamerleq), nersornaaserneqarami killitsisimaqaaq

Justine Boassen nunaqarfimmi katersugaasivimmi pilersitsinini pissutigalugu nersornaaserneqarpoq. Taanna illumik tuniniakkamik 2013-imi pisivoq taannalu katersugaasivittut ammarlugu, taanna aasakkuunerusoq takornarianit alakkarneqartarpoq.

- Nersornaaserneqarnera uannut pingaaruteqarpoq, tassami katersugaasivik ammarpara, angajoqqaama pisataasa eriagineqarnissaat pissutigalugit. Katersugaasivimmi katersugaatit 90 procentii angajoqqaama angerlarsimaffiannit pisuupput, Justine Boassen meeqqat atuarfianni Kulusumi Alivarpimmi nersornaasiiffiusumi oqaluttuarpoq.

Borgmesteri nipimik immiussamik ilassinnippoq
Kommuneqarfik Sermersuup borgmesteria, Asii Chemnitz Narup nersornaammik tunniussinermi peqataasinnaanngitsoq, nersornaaserneqartoq pillugu nipimik immiussamik oqalugiarpoq. Kommuneqarfik Sermersuumillu peqataatinneqartoq, Meeqqanut, Ilaqutariinnut Atuarfeqarnermullu ingerlatsiviup pisortaa, Helene Broberg Berthelsen nersornaaserneqartoq pillugu oqalugiarpoq.

- Kinguaariit arlaqartut ulluinnarni inooriaasii pillugit taamatullu tunumiut kulturiata tamanit ilisimaneqarnerulernissaa pillugu suliniuteqarnissarnik kissaateqarnerit qangali malugisimavarput – maanilu nunaqarfimmi katersugaasivimmik pilersitsinerit nunaqarfimmuinnaanngitsoq aammali Tunumi tamarmi innuttaasunut iluaqusiisussaassaaq taamatullu takornariat maanga tikittartut tunumiut kultuariannik ilisimasaqarnerulernissaat anguneqassalluni. Suliniuteqarnerit inuusuttunit nuannaartorineqarsinnaalluarnera ersarippoq, katersugaasivillu manna Kulusummiittoq Tunumut tamarmut aamma kommunitta ’ambassadøriatut’ maanna oqaatigineqalersinnaavoq, atuarfeqarnermut pisortaq oqarpoq.

Kulturikkut pigisat
Kulusuup katersugaasivia Tunumi qangali atorneqartartunik assigiinngitsunik katersugaateqarpoq. Soorlu kinguaariinnit arlalinnit qanga atisarineqartartut aamma ulluinnarni inuunermi soorlu iggavimmi imaluunniit iganermi atorneqartarsimasut katersugaatigineqarlutik.

2016-imi suliniuteqartut nersornaaserneqartut allat marluk tassaapput Nuummi najugaqartut Else Lea Olsen, Vittus Jerimiassen.

Powered by Labrador CMS