meeqqat atuarfiat

Atuarfik pillugu ilinniartitsisut oqallissapput

Imakip sinniisaat Ilulissani ataasinngornermit marlunngornerup tungaanut ataatsimiissapput. Meeqqat atuarfiat pillugu nalilersuisoqassaaq. Aaqqiissutissanik ujartuinissaq piffissanngorpoq

Ilinniartitsisut kattuffianni siulittaasoq Sivso Dorph

Ilulissani Hotel Arcticimi Imakip sinniisaat ataatsimiissapput ataasinngornermi marlunngornermilu. Meeqqat atuarfiat pillugu ilinniartitsisut 35-it ataatsimiissapput. Ilinniartitaanermut naalakkersuisoq Demokraatinit Nivi Olsen, Kanukokap siulersuisui, Danmarkimi ilinniartitsisut kattuffianni siulittaasoq Anders Bondo Christensen kiisalu aamma Imakimi siulittaasoq Sivso Dorph oqallinnissami peqataassapput.

Ataatsimiinneq nalunaaqutaq 10.00 ataasinngornermi aallartinneqassasoq Sivso Dorph oqarpoq. Tassani nammineerluni tikilluaqqusissaaq aamma Nivi Olsen aamma tikilluaqquseqataassaaq.

Atuarfeqarnermut anguniakkat
Siunissami suleriusissat marlunngornermi eqqartorneqassapput.

Kangaatsiap atuarfia unammilligassaqarngaartoq atuarfimmi ilinniartitsisoq Peter Storgaard oqarpoq.

- Naammaginartumik ingerlasut allanngortikkuminaannersaasarput. Atuarfik pillugu nalunaarusiaqartoqalernera pitsaasorujussuuvoq, taasumami takutippaa atuarfeqarnerup tungaatigut ajornartorsiuteqartoqarnera. Kikkut tamarmik tassunga akisussaaqataapput, Peter Storgaard oqarpoq.

- Angajoqqaajusut atuarfinnut ilinniartitsisunullu piumasaqaateqarnerusalertariaqarput. Meeqqatik eqqarsaatigalugit isornartorsiuinerusalertariaqarput. Aamma meeqqat atuakkatik angerlarsimaffimminnut nassartalertariaqarpaat ullut tamaasa, taamaasilluni angajoqqaat meeqqatik atuarfimmi qanoq ingerlanersut ilisimanerulissagaluarpaat, Peter Storgaard oqarpoq.

Powered by Labrador CMS