Atuarfik Mathias Storch qujanaq inuulluarnalu

- Atuarfik tassa inuulluaqquarput, atuarfigineqaqqissanngilaq, Atuarfiup pisortaa Karen Hansen, inuulluaqqusilluni oqarmat meeqqat nilliapput ersaattaallutillu aamma angajoqaat ilinniartitsisullu.

- Tamatuma takutiinnarpaa atuarfimmik nutaamik qanoq pisariaqartitsigisugut, atuarfittut naleqqutinngilaq atorsinnaananilu, qimassavarput pitsaanerusumik nutaamillu pisariaqartitsivugut. 2016-mi augustusimi nutaarsuarmik atuarfittaarnissarput assut nuannaarutigaarput utaqqisinnaanngilagut, tamanna upperilluinnarpara, kikkut tamarmik nuannaarput, assut Karen Hansen, oqarpoq.

Matunissaa piffissanngorsimavoq
Angajoqqaajusut Kathrine Petersen, aamma Ole David Petersen paniat atuarfimmi atuarpoq.

- Panipput peqqiilliuteqartarpoq amimigut anillattarluni, nakorsiartarlunilu, qasoqqasarluni, niaqorluttarluni. Taamaattumik Atuarfik Mathias Storch tamaanga killeqarnissaa piffissanngorsimavoq, kisianni misigisaq eqqumiilaarpoq nammineq atuarfiginikuullugu, Kathrine Petersen, Tamanut oqarpoq. Nangillunilu atuartuuteqarluni assorsuaq toqqissiallannarpoq.

Atuarfik nutaaq ukiut pingasuk qaangiuppata
Najuuttunut ilaavoq Ilinniartitaanermut, Ilageeqarnermut Kultureqarnermut Naliigissitaanermullu naalakkersuisoq Nick Nielsen.

-Killiffik erloqinakujuppoq, nuannerpoq ingerlariaqqinnissaq, taanna tamanut nuannaarutissaavoq, atuarfimmik nutaamik pitsaasumik pisariaqartitsisoqarmat. Angajoqqaat ilinniartitsisullu isumaqatigaakka atuarfik peqqinnanngilaq assullu pisoqaammat, nutaamik atuarfiliortoqassooq, aningaasanut inatsimmi 141,5 million kr.-nit atuarfiliornissamut illikartereernikuupput. Ukiut pingasuk qaangiuppata nutaamik atuarfittaarsimassaaq, Nick Nielsen oqarpoq.

Meerarpassuit, ilinniartitsisut najuuttullumi erinarsorpaat, qitillugulu Søren Lange-p, erinniaa taalliaalu, Inuunikasi, meeqqat ilaat breakdanserluni avalaannarmat, nuannarineqarluarpoq.