Atuarfik Mathias Storch ima isaterneqassaaq

Ilulissani meeqqat atuarfiannik sananissamut pilersaarutit immikkoortuini siullertut Namminersorlutik Oqartussat apriilip aqqarngani Ilulissani Atuarfik Mathias Storchip isaterneqarnissaanut suliffeqarfinnik siullermeerutaasumik neqeroortitsipput. Siullermeerutaasumik neqerooruteqartitsinermi suliffeqarfiit pingasut neqerooruteqartitsinermut najoqqutassanik nassinneqareerput, aammalu qanittukkut suliariumannittussarsiuussisoqareerluni.

- Naammagisimaaqalugu paasivara, suliassaq kiisami aallartinneqarsinnaalersoq. Suliap aallartinneqarnissaa amerlasuujulluta utaqqisimavarput, aammalu atuarfissap nutaap sananeqarnissaanut suiariumannittussarsiuussinissamut qilanaalereerpugut, Naalakkersuisoq Siverth K. Heilmann Atassut tusagassiutinut nalunaarummi oqarpoq.

Siullermeerutaasumik neqerooruteqartitsinissaq sioqqullugu illup akuutissat avatangiisinut ulorianartut suut akorinerai sukumiisumik misissuisoqartoq naalakkersuisoq nalunaarpoq. Taamaattumik isaterinissami aallaqqaammut avatangiisinut ulorianaatilinnik tamanik piiaasoqassaaq, tassani akuutissat avatangiisinut ulorianaatillit tamarmik piiarneqassallutik, isumannaatsumillu eqqarneqassallutik, tamatumalu kingorna illup sinnera isaterneqassalluni.

Suliffeqarfik KJ Greenland A/S akikinnerpaamik neqerooruteqartuuvoq, taannalu isumaqatigiissusiorfigineqassaaq. KJ Greenland A/S suliffeqarfiuvoq, sanaartornermik qaartiterinermillu suliaqartoq, aamalu qatanngutigiinnit Karl aamma Jens Jensen-ikkunnit pigineqartoq. Karl aamma Jens Jensen ukiuni qulikkaani kingullerni pingasuni sanaartornermik suliaqarsimapput, ukiuni 20-ni kingullerni Kalaallit Nunanni Entreprenørfirmat annersaasa ilaannik pilersitseqataasutut/piginneqataasutut ingerlasimallutik.

Atuarfik Mathias Storchimi avatangiisinut ulorianartunik piiaanerup isaterinerullu juunip qaammataani aallartissinnaalereernissaa sulissutigineqarpoq, 2014-imi ukiakkut naammassinissaa naatsorsuutigineqarluni.