Atuarfiit ineriartortinnissaannut pilersaarut nutaaq borgmesterip tatigaa

Sermersooq kommunerujussuanngormalli ukiut siulliit arfinillit atuarfeqarfik sumiginnarneqarsimavoq.

Maannali taamaakkunnaassaaq, borgmester Asii Chemnitz Narup (IA) oqaluttuarpoq.

Pilersaarut nutaaq

Kommuneqarfik Sermersuumi atuarfinnut ineriartortitsinermut pilersaarutikkut nutaakkut meeqqat atuarfiata saassunneqartaqisup pitsaassusaa qaffassarneqassaaq.

–Taanna anguniakkatsinnut arlalinnut uppernarsaataassaaq, taamaasilluni angajoqqaat, atuarfiit ilinniartitsisullu qularutigissanngimmassuk Sermersuumi atuarfeqarfitsinnut suut naatsorsuutiginerivut, Asii Chemnitz Narup Sermitsiaq.AG-mut oqarpoq.

Meeqqat atuarfiat saassutarineqartaqisoq

– Immitsinnut piumasaqaateqarnissarput qunugissanngilarput, tamannali pissaaq illua’tungeriinni tamani ataqqeqatigiissumik suleqatigiinnikkut, taanna itisiliivoq.

Asii Chemnitz Narupip atuarfiit, saassutarineqakulasartut pitsaassusiat illersorusuppaa – tamanna kingullermik saassunneqarluni Naaja Nathanielsenimit, taanna pingasunngormat atuartartut allagaatigut allakkami qitornani Nuummi atuarfimmut namminersortumut, Nuuk Internationale Friskolemut, nuunniarlugit, meeqqat atuarfiat arlalippassuariarluni pakatsisitsisarsimammat.

– Ukiuni kingullerni marlussunni atuarfeqarfipput iliuuseqarfigsartorujussuugaluarparput, borgmesteri oqarpoq taakkartuillunilu.

Suliniutit arlallit

– Suliniutivut angisuut marlussuit taassagukkit atuarfinni socialrådgiverinik atorfinitsitsisimavugut atuarfinnilu nerisaqartitsineq aallartissimallutigu. Nunaqarfiit atuarfiini timersorneq aallunnerulersimavarput. Kommunit ikittuinnaat ilagaatigut issusuunik pitsaassutsimut nalunaarusiamik tunniussisartut, ukioq mannalu meeqqat atuarfiata ukiuatut toqqarsimavarput, Asii Chemnitz Narup oqarpoq.

Siunertat pitsaasut amigaataarpasinngillat.

Assersuutigalugu kommunalbestyrelsip marsimi ulloq ilivitsoq atussavaat atuarfeqarnermut politikkimik samminnilluni.

Kisiannili atuarfiit atuarfinnilu atuartitsinerup pitsaassusia sooq taama naammagineqanngitsigiuaannarpat?

– Unammilligassarpassuagut isiginngitsuusaarnianngilagut. Uannut pingaaruteqarpoq ineriartornermut pilersaarut atorlugu siuarnissaanissarput, Asii Chemnitz Narup oqarpoq.

Kommunersi pitsanngorsaaniarpa, tamatumuunakkut angajoqqaat amerlanerusut qitornaminnik atuarfimmut namminersortumut nuussinissaat pinngitsoortinniarlugu?

• Isumaqarpunga pingaaruteqartuusoq meeqqat atuarfiata pitsanngorsarnissaanut tunngavissamik maanna pilersitsisoqalernera. Tamanna qaammatit marluk ingerlaneranni pisinnaanngilaq, tamanna nalunngilara. Maannali takutissavarput meerartavut tamaasa isumagisinnaallutigit. Isumaqarpunga ajortumik ingerlatsinngitsugut, pitsaanerulersinnaavugulli.

Sermersuumi atuarfiit qaffassarnissaannut aningaasat qanoq amerlatigisut immikkoortippigit?

– Missingersuutivut alanngaarsinnaanngilakka, ukioq mannali immikkkut 750.000 koruunit atugassanngortinneqarsimapput ineriartornermut pilersaarusiornissamut, tassa assersuutigalugu saqqummiussisussanut.

Ilaqutariinnut, meeqqat atuarfiata ajorpallaarneranik pakatsissuteqarsimasunut, qanoq oqarusuppit?

– Ilinniartitsisut angajoqqaallu eqqornerusumik iliuuseqarfigisariaqarpavut. Taamaattumillu maanna atuarfeqarnermut poltiikkiliorpugut. Oqarusuppunga attuumassuteqartut ikinnerpaamik sisamat atuarfimmik pitsanngorsaaqataassapput, tamakkualu oqarfigerusuppakka neriuutigalugu oqallinnermi peqataanissaat. Siunnersuutinik saqqummiussigitsi, ataatsimoorluta atuarfiit pitsaanerulersinniassavagut. Nuummi meeqqat atuarfii sisamaapput namminersortorlu ataaseq, isumaqarpungalu atuarfiit tamarmik suleqatigiissinnaasut imminnillu ilikkagaqarsinnaallutik.

Borgmesteritut pitsaasuussanngila atuarfiutinni pitsanngorsaatissanik piviusunik tikkuaasuuguit?

– Isumaqarpunga siullertut pisariaqartoq meeqqat atuarfiata ataavartumik qaffassarnissaanut tunngavissaqartariaqartoq.

Tassa imaappa pitsanngorsaanissanut maannakkorpiaq aningaasassaqanngitsoq?

– Meeqqat atuarfiannut aningaasaateqarpugut, immikkulli aningaasanik immikkoortitsisoqarsimanngilaq. Pisariaqarpoq eqqorluartumik takussallugu atuarfik qanoq isilluni ineriartortinneqassanersoq.

Atuarfeqarfik immikkut aningaasaliiffigineqassanngilaq ikilisaaffigineqartuinnassallunili?

– Upernaaru missingersuutit suliareqqaassavagut, taava takumumaarparput qanoq innersoq.

Missingersuummut qanoq saqqummiussassaqarpit, aningaasat amerlanerusut ikinnerusulluunniit atugassiissutigineqassappat?

– Tamanna tusagassiorfitsigut oqaatigissanngilara. Politikkikkut isumaqatigiinniarnissat ilagaat.

Kommuninni atuarfeqarfik sipaarniuteqarfigineqartarsimavoq. Ersissutiginngiliuk atuarfinni A-aamma B-holdinik pilersitsisoqarnissaa?

– Nuummi namminersortumik atuarfeqarpoq ataatsimik, isumaqarpungalu atuarfiup taassuma atuarfinnik allanik suleqateqarnera nukittorsartariaqaripput.

Paasisinnaavara B-holdinik pilersitsisoqarnissaa ersissutiginngikkit?

– A- aamma B-holdinik pilersitsinissamik ersissuteqarnermik eqqarsartariaaseq paasisinnaanngilara. Atuarfiit assigiinngitsut nukittussuseqarlutillu sanngiissuseqarput, borgmesteri naggasiivoq.

Tallimanngormat ullaap tungaani Naaja Nathanielsen meeqqat atuarfiat pillugu Sermitsiaq.AG-p atuartartuinik chateqateqarpoq.