Atuarfimmi suliaqarneq

Atuaqatigiit avatagiisilerinermi suliaqarsimanertik nuannisaarutigaat

Aasianni meeqqat atuarfianni atuaqatigiit 9. klassit ukiup ataatsip ingerlanerani avatagiisilerinermik suliartik ingerlassimavaat, innaallagiamullu atuinertik eqqumaffigilersimallugu, tupaallatsinneqarlutillu.

9.K fra Gammeqarfik i Aasiaat
Aasianni Gammeqarfimmi 9. klassit Koldingimi pulaarneranni assi

Aasianni Gammeqarfimmi atuaqatigiit 9. klassit avatagiisilerinermik innaallagissamulli atuinermik suliaqarsimapput. Maannalu atuaqatigiit innaallagissamut atuinertik eqqumaffiginerulersimavaat.

Atuaqatigiit suliaqarnerminni atuarfimmi atuaqatigiiaat angajulliit oqarasuaatinik atuinerat, batteerinik immiisarnerat Aasiannilu innaallagissamik atuineq qaqugukkut annerpaallunilu minnerpaasarnersoq misissorsimavaat.

Tupatsinneqarput

9. klassimi atuaqatigiit 20-usut ilaatigut Nukissiorfinnut apeqquteqarsimapput qaqugukkut Aasianni innaallagissamik atuineq annerpaallunilu minnerpaasarnersoq. Tupaallaatigisaannillu aasaanerani innaallagissamik atuinerup qaffasinnerpaaffianiittartoq paasivaat.

- Aasaanerani innaallagissamik atuineq qaffasinnerpaasarpoq suliffeqarfiimmi tamarmik ulapputtarput, containerillu nillisaatitallik aasaanerani atorneqangaatsiartarlutik, atuaqatigiit atuartunut allanut saqqummiussassaminni taama allapput.

Ukiukkut innaallagissamik atuineq annikinnerpaasarpoq pærimmi sipaartut ullumikkut atungaalernikuupput soorlu LED pærit.

Suleqatigiilluni suliaq

Gammeqarfimmi 9. klassit Koldingimi atuartut peqataat aamma avatagiisilerinermik suliaqarput Nordplus-imiilli angalanissaat tapiiffigineqarsimavoq, Regine Lundblad 9. klassit ilinniartitsisuat paasissutissiivoq.

- Atuartitamma Danmarkimi angalanerminni Koldingimi atuartunut misilittakkaminnik avitseqatigiipput, Regine Lundblad taama oqarpoq.

Sapaatip akunnera kingulleq Koldingimi atuartut Aasianniissimapput iluatsillugulu silaannap allanngorsimaneranik piniartumik oqaluttuunneqarlutik.

Atuineq eqqumaffigaat

Aasianni atuaqatigiit innaallagissamut atuinertik eqqumaffigisorujussuuvaat suliaminulli atatillugu paasisatik ingerlateqqikkusullugit, Regine Lundblad taama oqarpoq.

- Atuartut massakkut sila qaamatillugu klassiluunniit qimaleraangamikku qulliit ikumaannassanersut eqqarsaatigisalersimavaat, illinniartitsisuat taama oqarpoq.

- Gammeqarfimmi Koldingimilu atuartu silaannaap allanngoriartorneranut suliaqarnitsinni paasisagut saqqummiutissuagut, Ulloriaq Rafaelsen 9. klassimi atuartoq taama oqarpoq.

9. klassinut tapersersuisoq Nordplus nunani avannarlerni arfineq pingasuni baltikumimilu ilinniartitaanermut suleqatigiilluni suliaqartunut aningaasaliisarpoq.

Powered by Labrador CMS