Atualernissamut allatsinneq
Atualernissamut piareerluinnarput
Ullumi meeqqat atualernissaminnut allatsipput. Atualertussanut ulloq pingaarluinnartoq
Meeqqerivimmiut sapeeqalutik qilaarnaartut qularnanngitsumik februarip 21-at utaqqisimasaat kiisami nalliuppoq. Qaammatit marluk matuma siorna meeqqat atualernissamut piareersimanersut misilitimmata tamamik angusisimapput angajoqqaatillu ilagalugit ullumi Gammeqarfiup eqaarsaartarfiani nalunaaqutaq marlunut atulernissamut allatsikkiartorput.
1. klassip ilinniartitsisua Gammeqarfimmilu atualerlaanut siunnersorti Aviaaja Petersenip angajoqqaat meeqqallu atualernissaannut piareersarluarsimavai.
Meeqqerivimmiut 38-it Gammeqarfimmut allatsipput. Meeqqat atualernissaminnut allatsikkiartormata angajoqqaat aanaakkut aataakkut qanigisaassullu najuukkiartorsimapput.
Ulloq immikkuullarippoq, meeqqerivinniimmi atuarfimmut ikaarsaarneq angisoorujuuvoq.
Meeqqat augustimi atualissapput, atualinnginnerminillu piareersassallutik, Aviaaja Petersen taama oqarpoq.