Folkeskolen
Atualerngaartussarpassuit
Kommuneqarfik Sermersooq Atuarfik Hans Lyngemi atualeqqaartussat klassissaannik ataatsimik pilersitseqqittariaqarput atuartunik amerliartortunik malinnaaniarluni
Aasakkut atuanngiffiup kingorna Qinngutsinni Atuarfik Hans Lyngemi atualeqqaat klassii marluk pilersinneqassapput ullumikkut atuarfimmi klassi taamaattoq ataasiinnaagaluartoq.
– Ukiuni arlalinni meeqqat ikiliartoraluartut aasakkut atuanngiffiup kingorna atualertussatut nalunaarutigineqartut amerlanerat tupaallaatigineqarpoq. Atuarfik Hans Lyngemi atualeqqaat klassissaat ataatsimik ilasariaqarsimavarput Qinngutsinni meeqqat amerlassusaat qaffassimammat, soorlu atuarfiup kajumerineqarluni atuarfigiumaneqarnera aallaqqaataaniilli malugisimagipput, Kommuneqarfik Sermersuumi atuarfiit pisortaat Hans Peter Broberg oqarpoq.
Taassuma meeqqat amerliartornerannut pissutsit arlallit tikkuarpai.
– Ilaatigut illoqarfik amerlanernit nuuffigineqarpoq ilaatigullu ilinniartunik qitornalinnik amerlanernik maani ilinnialersoqalersimavoq, pisortaq oqarpoq.
Nuummi susoqarnersoq Nuuk Ugeavisimi oqaluttuanik amerlanernik atuarsinnaavutit. Aviisi akeqanngitsumik uani pisiariguk.