skolestart
Atualerlaat Narsami aatsaat taamak ikitsigisut
Narsami atualeqqaartussatut allatsissimasut 15-iinnaasimapput, 14-llu ullormi atualeqqaarfiusumik takkussimallutik
Tallimanngornermi nal. aqqanermut atuarfiup pisortaata Hans Peter Broberg-p atualerlaat angajoqqaavilu atuarfimmut tikilluaqquai.
Taassumap ilaatigut oqaatigaa atuarfimmi sulisut sapaatip akunnera atorlugu atuartitsinissaq piareersarsimagaat, nangillunilu angajoqqaat meeqqamik atuarnerannik malinnaanissaminnut pisussaasut, atuartullu qasuersimallutik ullaakkorsiorsimallutillu atuariartortarnissaat angajoqqaat akisussaaffigigaat.
Taamaattoqareermat najuuttunit tamanit Qaalermat qungujupput erinarsorneqarpoq.
Kingorna atuartut aqqi taagorneqarput, taaneqartullu atuarfiup pisortaa ilinniartitsisussatillu ilassiartortarpaat erfalasumillu tunineqartarlutik. Taamaalereeramik siullermeerlutik inimut atuarfigiligassaminnut isaapput, atuartunngornertillu aallarnerlugu.
Ukioq manna atualertut ikittuaraapput, ukiorpassuillu qaangiussimapput taamak ikitsigisunik atualertoqarmalli.
Atualertussatut allatsissimasut 15-put, 14-llu atualeqqaarnermut takkussimapput.
Atuarfiup pisortaata oqaluttuaraa atuarfik 230 missaannik atuartoqartoq, atualertut 14-it ilanngullugit.