Atuakkiortunut nersornaasiineranni Aavaat erinarsortut

Kalaallit erinarsoqatigiit Aavaat, Islandimiut, Savalimmiormiut Qallunaat Nunaanneersullu siullermeerlutik nunat avannarlermiut tussiutaat unnersiutiginnissut, Nunat Avannarliit Killiit Siunnersuisoqatigiivisa atuakkiortunut nersornaasiineranni atussavaat.

Nersonaasiineq novembarip aallaqqaataani DR-ip tusarnaartitsisarfiani Københavnimi pissaaq, tassani erinarsoqatigiinni erinarsortartut 100-t tusarnaartitsissapput.

Atuaruk: Nordisk Rådip atuakkanut nersornaataanut zombie atuagaq innersuunneqartoq

Kunngissaq peqataassasoq
Nersornaasiinermi pulaartut ilagissavaat kunngissaq Frederik aamma nunani avannarlerni aamma baltikumimi ministeriunerit inatsisartullu amerlasuut ilaassapput.

Kalaallit ilanngussineranni atuakkiortoq, Sørine Steenholdt 'Zombie Nunaat' innersuunneqarpoq.

Ukiut pingasut
Nunat avannarlerneersut tussiutaat unnersiut ukiut pingasuni suliarineqarpoq, atuakkiortumiillu Kim Leinemit aamma erinniortumit Sunleif Rasmussenimit nunat avannarliit ataatsimoornerannut ataqqinaatitut taanna pilersinneqarpoq.

Aavaat ingammik erinarsoqatigiit Savalimmiuneersut Húsakórið suleqatigilluarsimavaat, tassani erinarsoqatigiit unnukkut arlaleriarlutik sungiusaqatigiittarsimallutik, kalaallit erinarsoqatigiit tama ilisimatitsipput.