Atuakkiaq inuup inuuneranut tunngasoq
Atuakkiortoq Lars-Emil pillugu: Oqaluinnalersinnaasarpoq
Atuagaq Lars-Emil Johansenip inuuneranut tunngasoq 'Den utæmmelige' ippassaq saqqummerpoq. Atuakkiortup Niels Ole Qvistip atuakkamik inuttaasorlu unnussuarmut oqaloqatigiittarsimanertik oqallorissuuneralu uani oqaluttuarai.
Ukioq ataasinngulerpoq Niels Ole Qvistip Lars-Emil Johansen pillugu atuakkiani aallartimmagu.
Siorna maajimili oqaloqatigiinnerit 15-20-it missaanniissimapput.
- Lars-Emil tupaallannartumik isertuarani pivoq apeqquterpassuakkalu piareersimaffigilluarlugit akisarlugit, aamma apeqqutit eqquisinnaasut imaluunniit nuanninngissinnaasut akisarpai. Tupinnaannartumik eqqaamallaqqissorujussuuvoq, Niels Ole Qvist oqarpoq.
Kajumissuseqarluartoq
Oqaloqatigiinnerit ilaanna unnussuarmut ingerlasarsimapput.
- Amerlanertigut unitsiinnartariaqartarpara tassami niaqora paasissutissanik immeqqissinnaajunnaartarakku. Oqaluinnalersinnaasarpoq. Politikkikkut illuatungiliuttut taamak kajumissuseqartigisumut akiuussinnaasannginnerat paasisinnaalluarpara, Niels Ole Qvist oqarpoq.
Paasissutissarpassuit immikkoortitigassat misittagassallu katersorpai.
- Allattukkakka quppernernik 200-it sinnerlugit imaqarput.
Oqaaserpassuarni immikkoortiterineq
Suliassaq imaasiallaannaq naammassisassaanngilaq. Tassami Lars-Emil Johansen politikkeriuvoq pimoorussilluartoq. Oqallorinninilu immikkuullarequtigisaasa ilagaat.
- Atuakkami tusarfiit arlallit oqallorinnerarpaat - tamannalu nuannersuinnaannginnerarrallugu. Tusagassiortutut atuakkiortutullu apersorniaraanni oqaatsinut pikkorissusersua eqqaamaniagassaajuaannarpoq, Niels Ole Qvistip atuakkiornermini unammillernartut ilaat taama oqaluttuaraa.
- Danskisut oqallorissorujussuuvoq danskiniillu amerlanernit oqaatsinik atuillaqqinnerulluni. Taamaasillungalu uanga pisinnaasakka tamaasa atorlugit naqitikkani oqaaseqartinneqartarneri misissorsimavakka, ilaatigut ukiuni 50-ini kingullerni atuagassiat AG-ip saqqummersitai tamaasa misissorsinnaasimallugit.
Kusassagaanngitsoq
Lars-Emil Johansen Kalaallit Nunaanni politikkimi inuttut malunnaatilittut taassallugu pisariaqarpoq.
- Apersortarnerani atuakkami inuttaritinneqartoq kusassarneqarpat atuagaq atuarumaneqarnavianngitsoq arlaleriarluta oqaluuseraarput. Inuunermi nuannersuinnaasanngilaq. Inuunerup ingerlanerani unammillernartunik naapitassaqartuaannarpoq, tamakkulu atuakkiami taamaattumi ersersinneqartussaapput. Tamanna Lars-Emilip akuersaarpaa, Niels Ole Qvist oqaluttuarpoq.
Isornartorsiorneq akueralugu - Lars-Emilimeersuugunili ajunnginnerussaaq
- Imminut akerlerikkajunnera maluginiarpara: Allanit isornartorsiorneqarnini nuannarivallaarneq ajorpaa, ingammik politikkikkut illuatungiliuttunit. Akerlianilli imminut isornartorsiornissani eqeersimaarfigisarpaa ajorinerlu ajorlugu.
Lars-Emil Johansen facebook aqqutigalugu allatigullu imigassamik atornerluisuusimanini eqqaallattaasarpaa - tassanilu kukkussutini ilinniarsimallugit ersersinniartarlugu.
- Atuakkami arlaleriarluni kukkussutini nassuerutigai. Politikkikkut inuussutissarsiornikkullu. Aamma nammineq inuttut tunngatillugu eqqartuinitsigut, Niels Ole Qvist oqaluttuarpoq.
Waage Sandø pillugu atuakkiaminit misilittagaqartoq
Atuakkiortoq siornatigut assingusumik atuakkiaminit misilittagaqarluarpoq, tassa isiginnaartitsisartoq isiginnaartitsisarfimmilu pisortaq Waage Sandø (DR-imi nangeqattaartuni Krøniken, Rejseholdet aammalu Bedragimit ilisimaneqarluartoq) inuunera pillugu atuakkiornikuugami.
- Taamatut atuakkiornerma ingerlarnga Waage pillugu atuakkiorninnut misigisannut assersuunneqarsinnaalluarpoq. Aammami peqatigiingajakkamik.
- Waage Sandø Lars-Emilituulli imigassamik arnanillu ajornartorsiuteqarluni inuunerlunnikuuvoq. Taannalu aamma Lars-Emilituulli imminut ilaarutigillaqqissorsuuvoq taamaaseriarlunilu ilumoorsaaleriataarsinnaasarluni quianarsisarlunilu. Taakku marluullutik inuunerminni nuannisarlutik inuupput.