Innersuussineq
Atuakkiorlaap Politikens Litteraturpris pissarianissaa ilimaginngilaa
Nanortalimmiup 24-narnik ukiulik Niviaq Korneliussen Politikenip atuakkiortunut nersornaasiuttagaanik nersornaaserneqartussatut innersuunneqarpoq. Atuakkiorlaalli ajugaanissani naatsorsuutiginngilaa
Atuakkiaminik ’Homo Sapienne’, oktobarimi 2014-imi saqummersumi, atuakkioqqaartoq nersualaarneqaqaaq, maannalu Politikens Litteraturprisimik tigusisussatut innersuunneqarpoq.
- Soorunalimi innersuunneqarnera nuannaarutigeqaara, kisianni innersuunneqartut allat aamma pitsaasorujussuupput, taamaattumik ajugaanissamik eqqarsarneq uannut ungasissorujussuuvoq, Niviaq Korneliussen Nanortalimmiit taama oqarpoq.
Taasinerit tamarmik naleqarput
Politikens Litteraturprisimik tunineqartussaq sms-ikkut taasisitsereernerup kingorna nassaarineqassaaq, taamattumik taasinerit tamarmik naleqassapput.
Niviaq Korneliussen tigusisussatut toqqarniaraanni 'kode nk' allariarlugu 1218-mut nassiunneqassaq, kisianni taamaaliorniaraanni qallunaat sim-kortiannik peqarnissaq piumasaqaataavoq.
- Ilinnut taareerpit?
- Naamik, Niviaq Korneliussen nipituumik illarluni akivoq, imalu nangilluni:
- Aamma Maja Lee Langvadi toqqarusunneruara, atuakkiaa alutorsaatigeqigakku, atuakkiortunngorlaaq maniguulluni taama oqarpoq.
Ajugaagunili nutaamik atuakkiorusussinnaavoq
Politikenip atuakkiortunut nersornaasiuttagaa aningaasanik 200.000 koruuninik malitseqarpoq, kisianni Niviaq Korneliussenip aningasat eqqarsaatiginngilai.
- Aningasat eqqarsaatiginngilakka.
Nipangersimalaarsinnarlunili ima nangippoq:
- Kisianni ajugaassangaluaruma, taava ilinniarninniit pauseriarlunga eqqisseqqinnaarlunga nutaamik atuakkiorlunga aallartissangaluarpunga. Tassa imaanngilaq Hawaiimut aallariasaassasunga imaluunniit nutaamik biilitaassasunga, Niviaq Korneliussen illakusulluni oqarpoq.
Niviaq Korneliussen februaarip 16-ata tungaanut toqqarneqarsinnaavoq. Politikens Litteraturprisimik tunineqartussaq februaarip 22-ani saqqummiunneqassaaq.