Atuakkamik saqqummersitseqqammersoq Julie Berthelsen oqaloqatigalugu

Julie Berthelsen assigiinngitsutigut ilisimaneqartuuvoq. Julie Berthelsen pillugu allaanerusumik paasisaqartoqarsinnaassaaq atuakkiaani 'Sund balance'-mi ataasinngornermi saqqummertussami.

Julie Berthelsenip nerisassanut, inooriaatsimut pitsaasumut, sanigorsertarnermut, timigissartarnermut kiisalu nammineq inuttut qanoq inuuneq pitsaasoq isiginerlugu atuakkami allaaseraa.

Atuakkiani pillugu Sermitsiaq.AG-mut ima oqarpoq:

- Inooriaaseq pitsaasoq qanoq uanga nammineerlunga takorloortarneriga atuakkami allaaseraara. Atuakkami assigiinngitsut sammineqarput, nerisaqarneq, timi namminerlu pitsaasumik inuuneqarneq.

Naak sanigorsaraluarluni nerilluartoqarsinnaasoq Julie Berthelsenip atuakkiamini ilaatigut allappaa.

Oqimaassutsini aqukkuminaatsissimallugu ilaatigut atuakkiamini allappaa. Qanoq oqimaassuseqartartigisimanini oqaluttuaraa, tassani ilaatigut naartunermini nalinginnaasumit 25 kilonik oqimaannerutigilersimanini aamma ilanngullugu. Aappanilu assammik arsartartoq Minik Dahl Høegh meerartaaqqittussanngorput aappassaa.

- Peqqissuseq assigiinngitsorpassuarnik isumaqarpoq. Nammineq nuannarineruvoq. Inuit nammineerlutik nuannarisatik anguniartassavaat. Imaanngilaq uanga kisima nuannarisakka uani saqqummersinniarneqartut - inuimmi allat aamma allaanerusunik nuannarisaqartarput.

- Nerisassat mamarisuuakka. Nerisassiorneq nuannarisaraara, piffissaq sivisooq tassunga atorsinnaavara. Nerisassiorsuaarsinnaasarpunga aamma sungiusarnissara eqqaamallugu. Aamma nuannaarnissara puigorusunneq ajorpara, 35-nik ukiulik Julie Berthelsen oqarpoq.

Arnanut isummersuineq
Arnanut allanut atuagaq isummersuutitut saqqummersippaa. Atuagaq assigiinngitsunik imaqarpoq, aamma Julie Berthelsenip nerisassiornermik ilitsersuutaanik imaqarpoq. Naak atuagaq arnanuunerusoq tulluarnerugaluartoq aamma angutinit atuarluarneqarsinnaavoq.

Atuakkanik saqqummersitsisarfik Lindhardt & Ringhof aqqutigalugu Julie Berthelsenip atuakkiaa 'Sund balance' saqqummersinneqarpoq. Kalaallisuunngortinneqarnissaa suli aalajangiunneqanngilaq. Atuagaq qanoq tunisaqarsimanera apeqqutaavoq.

Julie Berthelsen DR 1-mi 'Aftenshow'-imi ataasinngornermi pulaartuussaaq.