meeqqanut atuagaq
Atuagaq kalaallisooq kineserisut nutserneqassaaq
Kalaalleq eqqumiitsuliortoq Lana Hansen, atuakkiani 'Sila', Dansk Kulturinstitut suleqatigalugu kineserisut nutserneqarnissaa sulissutigaa.
Assilissanik eqqumiitsuliorlunilu atuakkiortoq Lana Hansen, Dansk Kulturinstitut suleqatigalugu meeqqanut atuakkiani 'Sila' kineserisut nutserneqarnissaa sulissutigaa. Taamaammat Kinami atuakkiortut sunniuteqarluanerpaat ilaat sapaatit-akunnerisa tulliani Københavnimi naapissavai.
- Kinamiut atuakkiortut sunniuteqarluarsimasut naapinnissai pissangassutigeqaara, ingammik arnaq meeqqanut atuakkiortoq, Yang Hongying, 'Kinap J.K. Rowling'-iatut taaneqartartoq, Lana Hansen oqaluttuarpoq.
Toqqarneqarnini nuannaarutigingaa
Taanna oqaluttuarpoq, Kinamiut atuakkiortuisa tusaamasat sisamat, atuakkiortumik silap pissusaata allanngoriartorneranut atuakkiorsimasumik naapitaqarusuttut, naapinnissaanut toqqarneqarsimanini nuannaarutigaa.
Lana Hansenip atuakkiaa, Sila, nutaaliaallunilu oqaluttualiaavoq arfineq-pingasuniit aqqaneq-marluk tikillugit ukiulinnut tulluarsagaavoq, atuakkamilu Nunatta oqaluttuatoqaataanik Inuillu pinngortitamut isiginnittariaasiat ullumikkulli silap pissusaata allanngoriartornerani unammilligassartaanik imalik, atuagaq Milik Publishingimit 2009-mi saqqummersinneqarpoq. Atuagaq kalaallisut danskisulli saqqummersinneqarnikuuvoq. Ukioq manna atuagaq franskisut saamillu oqaasiinut nutsernikoq saqqummersinneqassasoq, taanna paasissutissiivoq.
Qaquguli kineserisut nutserneqassanersoq paasissutissiarisinnaanngilaa, kisianni suliarineqarnera aallartereersimavoq.
Danmarkimi kulturikkut naapeqatigiinneq
Sermitsiaq.AG-p Lana Hansen Danmarkimi Kulturmødet 2017-imi peqataareerluni Berlinimut Tysklandimiittumut angerlalersoq Skype-kkut oqaloqatigaa.
Taanna Eskimologi, nipilersortartoq assilissanillu eqqumiitsuliortoq Drude Aviaja Becky Larsen, Nordens husimi Reykjavikimiittumi pisortaq, Mikkel Haarder Munck-Hansen atuakkiortorlu Else Lidegaard peqatigalugit Issittoq pillugu oqallinnermi peqataaqqammerpoq.