qanoq isumaqarpit?
Atuaasartut kamapput: Great Greenland tunniutiinnarpoq!
Sermitsiaq.AG-mi atuaasartut amerlasuut isumaqarput, Great Greenlandip nioqqutissat nalinginnaanerusut aammalu inuulluarniutaanngitsut suliarinerusariaqaraluarai. Qanoq isumaqarpit?
Piffissami kingullermi maani nittartakkami atuaasartut qisuariaataat amerlasuut atuarsinnaasimavagut, Great Greenlandip mersortarfiata matuneqarnera taakku ajuusaarutigaat.
Atuaruk: Great Greenlandip mersortarfik matuaa
Ammeriviup 'inuit nalinginnaasut' pisisartoralugit isertitaqarnerusinnaanera isumaqatigiissutigineqartorujussuuvoq.
- Nunani tamalaani mersortarfiit unammillernagit ulluinnarni atorsinnaasunik, inuillu nalinginnaasut akissaqarfigisaannik sanaartorneq aallartinniarsiuk, bussertitsisoq Benny Kokholm allappoq.
Akisuallaartoq
Taanna allakkamik ilanngussamini atuaasartunik allanik 20-nit sinneqartuni taperserneqartumi, ingerlatsiviup amernik tunisassiaat akisunngitsut ikittuusut erseqqissaatigaa, suliffeqarfiullu amigartooruteqaqartarneranut pissutaasimasinnaanerarpaa.
- Eskimopels (Narsami ingerlatsiviusimasoq, red.) amermik kavaajaliortarsimavoq Nunatsinniittut inuit amerlasuut atorsimasaannik. Ullumikkut amernik ulluinnarsiutinik kavaajalinnik takussaasoqarpianngilaq, atuaasartoq allappoq.
Ilusilersuisartut tusaamasat taamaatillugit
Sermitsiaq.AG-mik atuaasartoq alla, Sofie Josefsen, Great Greenlandip inuulluarniarneq kisiat ukkatarineranut aamma isornartorsiuivoq.
- Paasisinnaanngilara kalaallit pisisartut sooq aallunneqannginnersut. Atisanik oqortunik uagutsinnit Kalaallit Nunaanniittunit akilerluarneqarsinnaasunik mersortoqartaraluarpat, immaqa niuernermik makisitsisoqassagaluarpoq?, taanna aperivoq.
- Illuatungaanik ilusilersuisartunik nunarsuarmi tusaamasaasut kisimik aamma tuniniaavik ungasissoq aallunneqarput, Sofie Josefsen oqaaseqartarfimmi Facebookimik atuisunit 22-nik taperserneqarluni taama allappoq.
Sisamanngornermi unnukkut inuussutissarsiornermut naalakkersuisuugallartoq, Randi Vestergaard Evaldsen (D), Great Greenlandip maanna ammit piniartut akissarsissutigisartagaat kasiilerneqartalissasut nalunaaruteqarpoq, Qaqortumi ammit tunineqanngitsorpassuit katersuunnerat pissutigalugu.
Atuaruk: Ammit atorneqarsinnaanngikkaluit piniartunut aningaasaliisoqartartoq
Naalakkersuisut suliffeqarfimmut Namminersorlutik Oqartussanit pigineqartumut Great Greenlandimut iliuuseqarnerat, pisortap Lars Bergip tunuarnerata nalaani pivoq, tamanna Sermitsiaq.AG-p sisamanngornermi ullaakkut allaaseraa.
Atuaruk: Great Greenlandip pisortaa soraarpoq
Qanoq isumaqarpit? Great Greenland maannamit nalinginnaanerusunik nioqquteqalernissani aallunnerusariaqarpaa?
Allaaserisap qulinnguani taasinermi peqataagit