aatsitassat
Attuumassuteqanngitsunik misissuisoqarnissaa piumasaraa
Narsami peqatigiiffiup Urani Naamik piumasaraa Kuannersuarni piiaaffeqalissappat avatangiisinut inuiaqatigiinnullu kinguneqaatissannik attuumassuteqanngitsunik misissuisitsisoqassasoq
Kuannersuarni piiaaffeqalissagaluarpat aatsitassanik qaqutigoortunik, urani saniatigut tunisassiaralugu, piiaaffiusumik peqatigiiffik Urani Naamik-meersup Mariane Paviassenip Narsap siunissaa ernumanartoqartippaa.
Sermitsiamut sapaatip akunnerata naanerani saqqummersumut Mariane Paviasen oqarpoq: – Oqartussaasut oqarput Kuannersuarni piiaaffeqalissanngippat Narsaq toqussasoq, uagulli oqarpugut Kuannersuarni piiaaffeqalerpat Narsaq toqussaaq.
Peqatigiiffiup Urani Naamik taamatut ernumanartoqartitseqatigai Narsap Qassiarsuullu eqqaanni savaatillit, tamakkua ernumassuteqarnertik saqqummiummassuk Sermitsiami marsip 27-anni saqqummersumi allakkatigut ammasutigut, taakkulu aamma Tamanut Kujataani apriilip 15-ianni saqqummersumi ilanngunneqarput.
Peqatigiiffiup ersissutigaa illoqarfik savaateqarfiillu qanittuaniittut najugaqarfiusinnaajunnaassasut uranimik piiaasoqarneratigut radiop qinngorneranik ulorianartumik mingutsitsisoqarnera pissutigalugu, kiisalu tatsimi Taseq-mi, piiaaffimmit eqqagassanik inissiisarfissami, imeq mingutsinneqarsimasoq illoqarfiup imermik pilersorneqarneranut akulerussinnaammat.
Peqatigiiffiup ersissuteqarnera misissuisitsinissamillu piumasaqaataa annertunerusumik atuarsinnaavat Sermitsiami sapaatip akunnerata naanerani saqqummersumi, taannalu uani pisiarisinnaavat.