attaveqaatit
Attumi attaveqaatit kipisaqattaaqqipput
Attormiut telefoni, internet piffissap ilaani atorsinnaanngilaat, soorlu aamma radiukkut tusarnaarsinnaanatik tv-kkullu isiginnaarsinnaanatik. Teknikerit marluk juulliaqqami nunaqarfiliartinneqalerput
Kangaatsiap eqqaani nunaqarfimmi Attumi attaveqaatit ima kipisaqattaartigaat nunaqarfimmiunit piffissap ilaani telefonit, interneti atorneqarsinnaanani, soorlu aamma radiukkut tusarnaarsinnaanatillu tv-kkullu isiginnaarsinnaanngitsut.
Tele-Post tusagassiuutinut taama nalunaaruteqarpoq.
Tele-Postimit ilisimatitsissutigineqarpoq ajoqutaasup suunera suli paasineqanngitsoq.
- Kisianni teknikerit marluk aqagu helikopterimik nunaqarfiliarniarput ajornartorsiutit iluarsiniassallugit, Tele-Post ilisimatitsivoq.
Atuaruk: Kangaatsiap eqqaani radiokæde attaveeruppoq
Kim Zinck, teknikikkut ingerlatsinermik Telemi aqutsisuusup oqarnera naapertorlugu, maannakkut attaveqaatit kipisaqattaarnerat, aamma sapaatit akunneranni kingullermi sakkortusaaviup attaveerunnera ilaatigut Attumi sullittakkanik eqquisoq, imminnut attuumassuteqanngillat.
Tele-Postimit neriuutigineqarpoq aqagu pingasunngornermi unnutsinnagu ajornartorsiutit iluarsiumaartut.