Inatsisartut
Attaviitsoq qineqqusaarnerit nalaanni ballonit atortarunnaarnissaat sulissutigaa
Qineqqusaartoqartillugu ballonit takussaajunnaarsinnaapput
Innuttaasut plastikkinik atuinerat qanoq annikillisarneqarnissaannut Mimi Karlsenip oqallissaarutitut siunnersuutaa, ullumi sisamanngornermi Inatsisartuni eqqartorneqarpoq.
Oqallittoqarnerani attaviitsoq Michael Rosing apeqqutigaa, qineqqusaarnerit nalaanni balloninik agguaassisarneq partiinit isumaqataaffigineqarnersoq.
Partiinillu isumaqatigiissusiorsimavoq ilumut taamatut angorusutaqarunik atsiorfigisinnaasaannik
- Pinngortitami illoqarfinnut avinngarusimasumi nassaassat ilagaat ballonit sinnikui. Illoqarfimmi ballonit takusartakkagut amerlanerpaasarput qineqqusaarnerni, partiit tamarluinnarmik meeqqanut balloninik agguaassisarmata. Pimoorullugu isumaqarutta microplastik peertariaqarlugu taava aallarniutigalugu immitsinnut neriorsorsinnaavugut qinersisartugullu, qineqqusaartoqassatillugu kingorna ballonit atoqqinniarnagit. Kina peqataarusuppa?, Michael Rosing aperivoq.
Partiit annerit marluk, Siumut aamma Inuit Ataqatigiit apeqqummut ersarissumik akissuteqanngillat, kisianni IA'minngaanneersoq Kelly Berthelsenip tusangiasaarutigaa, qinersisoqarnerata nalaani partii balloninik atuiunnaarnissaa. Demokraatit isumaqataalluinnarput, ballonillu atorunnaarusullugit, Partii Naleqqallu siunissami qineqqusaarnerit nalaanni balloninik atuiffiunnginnissaa ammaffigaat.