Raajat
Attaveqatigiilluarnikkut pilersaarusiorluartarput
Ilulissani Royal Greenlandip tunitsivianut aalisariutit tunitsivimmilu sulisut attaveqatigiilluarnerisigut sulineq ingerlaavartumik ingerlasarpoq
Tamatigut raajarniut tunisisussaq aallannginnermini maani allattaavitsinnut nalunaarsuiartortarpoq qaqugu tulaassiniarnerluni qanorlu annertutigusunik tulaassiniarnerluni nalunaarutigalugu. Royal Greenland nittartakkamini paasissutissiivoq.
- Taamaalilluta raajarniut tunisiniarluni tulalerpat maani tunitsivitsinni karsinik sikulersukkanik piareersimasuuteqartarpugut, Ilulissani Royal Greenlandimi tunitsivimmi sulisunut aqutsisoq Anders Berthelsen oqarpoq.
Sulisut amerlassusaannut pingaarutilik
Tunisassiorfimmi tunisassiassat annertussusai apeqqutaallutik sulisut amerlassusaat ullormiit ullormut allanngorartarput. Tunisisartut tunitsivimmilu sulisut attaveqaqatigiinnerisigut aamma tunisassiorfimmi sulisut qanoq amerlatigisut suliartortinneqarnissat aalajangerneqartarpoq.
Anders Berthelsen aamma oqaatigaa raajarniut ulluni sisamani aalisarsartoq, aamma raajarniutit arfiniliusut ataatsikkut tulaassinnginnissaat nakkutigineqartartoq
Raajarniutaatillit attaveqatigiinneq iluarisimaaraat
Raajarniut Avatamik piginneqataasup Edvard Magnussenip Ilulissani Royal Greenlandimut attaveqartarnini aamma iluarisimaarpaa.
- Uagullu tunisisarnitta aalaakkaanerunissaanut attaveqarluarnikkut qulaajaasarpugut, Edvard Magnussen oqarpoq.