tele
Attaveqaatinut sakkortusaavik attaveeruppoq
Kangerlussuarmut Kangerlussuarmiillu nalunaarasuartaatitigut attaveqarneq kipisoorpoq
Arfininngormat ullaap tungaani Kangerlussuup kangerluani attaveqaatinut sakkortusaavik NAU attaveeruppoq. Taamaattumik Kangerlussuarmi attaveqaqatigiinnermut aqqutit tamarmik atunngillat. Tele-Post tusagassiorfinnut nalunaarutikkut taamatut paasissutissiivoq.
Kangerlussuarmi timmisartorneq eqqorneqanngilaq, timmisartunut attaveqarneq Nuummit ingerlanneqartarmat.
Teknikerit marluk Nuummit sakkortusaavimmut maanna timmisartuunneqarput iluarsaassiartortillugit, pilersaarutillu malillugit nalunaaqutaq 12.15 tassunga apuutissapput, attaveqarnermut pisortaq Ivalo Egede oqarpoq, teknikerillu paasereerpassuk attaveerunnermut suna pissutaanersoq, qanoq pisoqassanersoq oqaatigisinnaavaa.