anisitsinerit

Attartortut qulingiluat politiinit anisinneqartut

Inissiaatileqatigiiffiup Inip januaarimiinnaq attartortut qulingiluat anisippai. Taakkua ataatsimut 234.292,34 koruuninik akiitsoqarput. Nuna tamakkerlugu Inip attartortui suli anisinneqanngitsut 572-it maanna 16 millioner koruuningajannik akiitsoqarput

Attartortunut 572-inut, sulili inigisaminnit anisinneqarsimanngitsunut, maannamullu katillugit 15 millioner koruuninik akiitsoqartunut, politiini ullumikkut suliassaqarpoq

Maniitsumi politiit Inissiaatileqatigiiffik Inip inissiaataani attartortut pingasut inigaannit pingasunngormat anisippaat. Aamma Nuummi Qasigiannguanilu politiit januaarimi taamatorluinnaq suliaqarsimapput. Nuummi attartortut sisamat, Qasigiannguanilu attartortut marluk anisinneqarsimammata.

Taakkua anisinneqartut qulingiluat Inimut ataatsimoorlutik 234.292,34 koruuninik akiitsoqarsimapput.

Politiinut suliakkiutit 572-it ingerlapput
Kisianni Inip attartortut qulingiluat taakkua kisiisa inigisaminnut attartornerannut akiliisinniarnissaanut niaqorluuteqanngilaq.

Inimiimmi nalunaarutigineqartut naapertorlugit Inip attartortuinut ullumikkut suli anisinneqarsimanngitsunut suliassat 572-it maanna politiinut tunniunneqarsimapput, taakkua suliakkiutigineqartut katillutik 15.722.125,76 koruuninik Inimut akiligassaqarput, tassa 16 millioner koruuningajannik.

- Kisianni imatut pisoqaqqakujuttarpoq attartortut politiinut tunniunneqaraangamik akiligassaminnut akiliisinnaaleriasaartarnerat. Taamaammat politiinut suliassanngortitat kisitsisaat akiitsullu annertussusaat sukkasuumik allanngoriasaarsinnaasarpoq, Inimiit taama ilisimatitsipput.

Ilaqutariit 26-it Sermersuumi
Kommuneqarfik Sermersuup inissiaatileqatigiiffiutaani Iseritsimi, kommuunip inissiaataanik allaffissornikkut ingerlatsiffiusumi, ilaqutariit 26-vit inigisaminnit anisinneqartussatut nalunaarsorneqarsimapput. Taakkua ilaqutariit 26-vit Nuummi, Paamiuni, Tasiilami aamma Ittoqqortoormiini najugaqarput.

Nuna tamakkerlugu Inissiaatileqatigiiffik Inimi attartortuusimasut, maannalu anisinneqareersimasut ataatsimoorlutik katillugit 85 millioner koruuninik akiitsoqarput. Taakkua pingasorarterutaat nunatta kujataaninngaannersuupput.

Inissiaatileqatigiiffik Inip Maniitsumi attartortumini anisitaani pingasuni, marluk meearartaqarmata anisitat inaannut inissinneqarsimasut, inissiaatileqatigiiffimmit Sermitsiaq.AG-mut ilisimatitsissutigineqarpoq.

Powered by Labrador CMS