Nuuk
Attartortut 420-t suliffimminnut atatillugu inigisamik pisiarinissaannut periarfissinneqassapput
Taakkua pingajorarterutaasa neqeroorummut akuersaarnissaat Namminersorlutik Oqartussanit naatsorsuutigineqarpoq
Nuummi Qinngutsinnilu attartortut katillugit 420-t suliffimminnut atatillugu inigisamik pisiarinissaannut aappaagu periarfissinneqassapput.
Taamatut neqerooruteqarneq Qinngutsinni Suloqqami portusuuliani qulini ineqartunut 300-nut kiisalu Tuapannguani napasuliani sisamani ineqartunut 120-nut atuuppoq.
Neqeroorut Naalakkersuisut 2014-imut aningaasanut inatsisissatut siunnersuutaannut ilaavoq, inissianillu tunisaqarneq pilersaarutit naapertorlugit nunatta karsianit 105 millioner koruuninik isertitsissutigineqartussatut naatsorsuutigineqarluni.
– Attartortut pingajorarterutaasa neqeroorummut akuersinissaat naatsorsuutigaarput. Kisitsit taanna soorunami nalorninartortaqarpoq, kisianni taamatut pitsaanerpaamik missingiivugut, Namminersorlutik Oqartussani illuutinik piginneqatigiimmi Illuut A/S-imi inissianik attartortitakkanik piginnittumi pisortaq Olafur P. Nielsen oqarpoq.