Wednesday, October 25, 2017 - 13:44

Atsiortitsisoq nuannaarpoq: Inuiaqatigiit ajugaapput!

Assi.: Privat
Naalakkersuisoqatigiit Inatsisartut ilaqutaasa akiliutsillutik angalasarnerisa ilaneqarnissaannut siunnersuummut tapersiinertik unitsimmassuk, atsiornernik katersuiniarnermut aaqqissuussisup Salik Bianco Jeremiassenip nuannaarutigaa. Assingusumik katersuiniartitsisoqalersoq ilisimatitsivoq.

- Partiit tapersiinertik unitsimmassuk nuannaarutigisorujussuuara.

Salik Bianco Jeremiassen oqarpoq, taanna Inatsisartut ilaasortaasa ilaqutaasa akiliutsillutik angalasarnerisa marloriaatinngortinneqarnissaannut akerliulluni atsiornernik katersuiniartuuvoq.

Ullumi pingasunngornermi partiit naalakkersuisoqatigiit siunnersuummut tapersiinertik unitsippaat, taanna Inatsisartut siulittaasuata Lars-Emil Johansenip, partiit naalakkersuisoqatigiit sinnerlugit saqqummiunneqarsimavoq.

Atuaruk: Politikerit akiliutsillutik angalasarnerisa amerlineqarnissaannut akerliusut ajugaapput

Tamat oqartussaaqataanerat ajugaasoq
''Tamat oqartussaaqataanerat ajugaasoq'', Salik Bianco Jeremiassen oqarpoq.

- Inuiaqatigiit aamma tamat oqartussaaqataanerat ajugaavoq. Siunnersuutip unitsinneqarnera oqiliallaatigaara. Inatsisartuni akuerineqalerpat akerliussutsimik takutitsinissarput pilersaarusiuleraluarparput, taanna oqaluttuarpoq, assartuinermut assartugalerinermullu ilinniartuuvoq 28-nillu ukioqarpoq.

Atsiornernik katersuiniarneq nutaaq
Assingusunik atsiornernik katersuiniarnerit tamaanga killeqanngillat.

Tassami Inatsisartut Siulittaasoqarfiata partiinut Inatsisartuniittunut tapiissut qaffanniarlugu siunnersuut saqqummiunnikuuaa.

- Innuttaasut amerlasuut siunnersuummut akerliupput. Atsiornernik katersuiniarnermik assingusumik pilersitsiniarluni suliaqartoqarpoq. Uangaassanersoq imaluunniit allaassanersoq naluara, Salik Bianco Jeremiassen oqarpoq, taanna inuit attaveqaqatigiittarfiini taperserneqarlunilu pilluaqquneqarpoq.

Atuaruk: Naalakkersuinermik sulinermut tapiissutinik millioninik qaffaaneq

Seneste nyheder / Nutaarsiassat kingulliit