Atsiornernik katersineq: Nuutoqaq allanngutsaaliorneqarli

- Ikinngutitoqara Lars-Emil Johansen (Inatsisartuni siulittaasoq) oqarfigaara inuutillunga Aqqaluup Aneerasaartarfiani Inatsisartut ataatsimiittarfissaannik sananissamut akuerineqarnavianngitsoq.

Taama tusagassiortoq kultureqarnermullu naalakkersuisuusimasoq Stephen Heilmann Nuuk Ugeavisimut oqarpoq.

- 73-iinnarnik ukioqarpunga, ilaqutariinnilu utoqqalingaatsiartarpugut, taamaattumik sanaartortoqarnissaa sivisuumik ilimanaateqarnavianngilaq...

Stephen Heilmann peqatigiiffimmi Nuummit Eqqaamasani allattaavoq, siulittaasorlu Orla Dalager ilaasortallu arlallit peqatigalugit Nuutoqqap aserorterneqannginnissaa anguniarlugu atsiortitsiortornermik suliaqarsimalluni.

Sulineq ingerlaavartoq
Atsiornerit 904-t borgmesterimut Asii Chemnitz Narupimut tunniunneqarsimapput.

Akerlerineqartoq tassaavoq Nuutoqqami akunnittarfimmik, inuinnaat illuinik arfinilinnik suliffeqarfinnik namminersortunik sisamanik tuninaasarfinnillu sanaartornissamik kommunip pilersaaruteqarnera, Nuuk Ugeavisimili aamma eqqaaneqartutut Inatsisartut Nuutoqqami ataatsimiittaliornissamik aamma pilersaaruteqarput.

- Kommuneqarfik Sermersooq Inatsisartullu qanoq isumaqarnitsinnik ilisimaarinnipput, inatsisartullu ataatsimiittarfissaat akeralugu atsiornernik nutaamik katersissanngilagut, kisiannili Nuutoqaq allanngutsaaliorniarlugu suliarput ingerlateqqinniarlugu neriorsuilluta, Stephen Heilmann oqarpoq.

Allaaserineqartoq tamaat Nuuk Ugeavisimi atuarneqarsinnaavoq. Nuuk Ugeavis akeqanngitsumik ataani aaneqarsinnaavoq:

Nuuk Ugeavis Uge 29 2014

Klik her for at læse