Atortut ajoquteqarneranni internet atorsinnaajunnaartoq

Nunarput tamakkerluni SMS-ip internetillu atorsinnaajunnaarneranik sapaatiummat eqqugaavoq, tassani akunnerit marluk internetertoqarsinnaasimanngilaq.

Ingerlatseqatigiiffiup qitiusumik routereqarfiisa internetip atorneqarsinnaajunnaarneranut pissutaasut, Tele-Post ilisimatitsinikuuvoq.

Kalaallit Nunaat tamakkerlugu internetip atorneqarsinnaajunnaarneranut suna pissutaanersoq, Sermitsiaq.AG-p Tele-Post aperaa.

Atuaruk: Nunarput tamakkerlugu SMS'it internettimullu attaveqaatit ajortut

- Qitiusumik routerip internetip attaveerunneranut pissutaasut sumiippat?

- Pingaarnertut routeri Nuummiippoq, internet breakout routerit Danmarkimi Canadamilu. Breakoutip isumaa: Tele-Postip internetimut attaveqaatip sinneranut atassutaa, Europa aamma Amerika Avannarleq aqqutigalugu, Tele-Postip attaveqaqatigiinnermut pisortaa, Arnakkuluk Jo Kleist akivoq.

- Immap naqqatigut kabelip ikkussuunneqarneranut ajutoorneq attuumassuteqarpa?

- Naagga, tassunga attuumassuteqanngilaq.

- Internetip attaveeruttoornera pinngotsoorneqarsinnaagaluarpa?

- Atortunik ajutoorpugut, tamatumalu kingunerisaanik aamma nammineq iluarsiissutaasussaq ajutoorpoq. Attaveqaatip aappaata attaveerunnerani attaviup aappaanut nammineq nuuttarpoq. Assersuutigalugu Islandimut/Danmarkimut attaveeruppat, taava nammineq Canadamut attavinittussaavoq. Kisianni tamanna nammineq nuupparput.

- Internetip attaveerunneranut sillimmateqartoqannginnami?

- Oqaatigineqareersutut sillimmateqarpoq, taannalu nammineq nuunnissaralua ajutoorpoq.